Pavlodarda 261 bozbala áskerı mindetin óteýden jaltaryp júr
PAVLODAR. KAZINFORM — Bıyl aımaq boıynsha áskerge 800-den astam jas shaqyrylady. Oblysta jalpy sany 10 600 azamat áskerge jaramdy jasta.
Áskerge shaqyrý naýqany 1 naýryzdan bastalmaq. Byltyr Otan aldyndaǵy boryshyn óteýge 1544 azamat shaqyrylǵan. Shaqyrý qaǵazdary azamattardyń turǵylyqty mekenjaıyna nemese jumys ornyna jiberiledi. Budan bólek, SMS-habarlamalar da joldanady. Oblystyq qorǵanys isteri jónindegi departament ókilderiniń málimetinshe, bıyl 120 azamat Ulttyq qaýipsizdik komıtetiniń Shekara qyzmetine, 381-i Qarýly Kúshterge, Ulttyq ulanǵa 300 jáne 9-y Memlekettik kúzet qyzmetine áskerı boryshyn óteýge shaqyrylady.
«Keıde áskerı mindetti bozbalalar SMS-habarlama almadym dep jaltarady. Endi biri: „SMS-ti múlde oqymaımyn, Whatsapp-ta ǵana otyramyn“ degen syndy syltaý aıtady. Habarlama 1414 operatorynan da keledi. Sondyqtan túrli syltaý aıtyp, áskerden qashýdyń esh jóni joq», -deıdi Pavlodar qalalyq qorǵanys isteri basqarmasynyń basshysy Shyńǵys Sarybaev.
Azamattarǵa áskerı boryshyn qysqartylǵan merzim ishinde ótep shyǵýǵa bolady. Ol úshin memleketke 304 myń teńge kóleminde jarna tóleýi tıis. Bira budan bylaı 40 kúndik áskerge barǵandar men áskerı kafedra aıaqtaǵandarǵa áskerı bılet berilmeıdi. Tek ǵana olardyń áskerı qyzmetti ótkergeni týraly málimetter e-gov portalyndaǵy jeke kabınette kórsetiledi.
