Pavlodarda 25 jastaǵy jigitti túngi klýbtyń janynda uryp óltirgen

PAVLODAR. KAZINFORM – Polıtsııa densaýlyqqa qasaqana zııan keltirý faktisi boıynsha tergeý júrgizip jatyr. Kúdikti ýaqytsha ustaý ızolıatoryna qamaldy.

Pavlodardaǵy «Gogol» túngi klýbynyń janynda kisi ólimi boldy. Tań aldynda kóńil kóterý ornynan shyqqan jastar tóbelesip, saldarynan 25 jastaǵy jigit kóz jumdy.

Óńirlik jedel járdem stansasynyń baspasóz qyzmeti oqıǵa ornyna jedel járdem brıgadasy barǵanyn, alaıda qyzmetkerler jigittiń ómirden ótip ketkenin tirkegenin jetkizdi.

«Oqıǵa tań aldynda bolǵan. Jas jigitti áldebireýlerdiń uryp-soqqany týraly shaqyrtý shamamen saǵat 04.48-te tústi. Medıtsınalyq brıgada jedel jetkenimen  soqqy tıgen azamattyń kóz jumǵany anyqtaldy», - dep habarlady jedel járdem qyzmetinen.

Al, Pavlodar oblysy polıtsııa departamentiniń baspasóz qyzmeti qazirgi kezde polıtseıler atalǵan oqıǵany jiti tekserip jatqanyn habarlady.

«Túngi klýbtardyń biriniń janynda bolǵan densaýlyqqa qasaqana aýyr zııan keltirý faktisi boıynsha tergeý júrgizilip jatyr. Kúdikti ýaqytsha ustaý ızolıatoryna qamaldy», - dep málimdedi oblystyq polıtsııa departamentiniń baspasóz qyzmeti.

Eske sala keteıik, Pavlodarda aýlalardyń birinde er adamdy pyshaqtap óltirdi.