Pavlodarda 25 «saqaldy» qurylys ákimniń baqylaýyna alyndy
PAVLODAR. QazAqparat - Pavlodarda qurylysy aıaqtalmaǵan 25 nysan bılik basshylyǵynyń nazaryna alynǵan. Bul týraly turǵyndarmen ótkizgen eseptik kezdesý barysynda shahar basshysy Nurjan Áshimbetov aıtty, dep habarlaıdy pavlodarnews.kz.
Qala turǵyndarynyń biri Ýsolka shaǵynaýdanyndaǵy Sátbaev, Tkachev kósheleriniń boıyndaǵy jáne «Lıder» dúkeniniń qasyndaǵy nysandardyń bolashaǵyna alańdaýly ekenin jetkizdi. - Apta saıyn osy máselege qatysy jumys júrgizilýde jáne nátıjesi de bar, - deıdi Nurjan Áshimbetov. - Biz qurylysy toqtap turǵan on nysandy ornynan qozǵadyq jáne menshik ıesin qalypqa keltirýge nemese iske asyrýǵa májbúr ettik, basqa menshik ıesine tapsyrdyq. Ýsolka shaǵynaýdanyndaǵy ǵımarat jýyq arada aýktsıonǵa qoıylady. Bul jerde meıramhana ashýǵa nıet bildirgen azamat ta tabyldy. Tkachev kóshesindegi jer telimi bankte kepildikte tur. Sot sheshimimen jer telimin memlekettiń menshigine tapsyrý týraly sheshim qabyldanǵan. Sonymen qatar, osy shaǵynaýdanda 50 metrlik basseıinniń qurylysy júrgizilýde".
Qala ákiminiń aıtýynsha, ákimdik bankpen birge aýktsıon uıymdastyrady. «Astorııa» meıramhanasyna qarsy ornalasqan jer telimine qatysty saýda ortalyǵy bar kópqabatty turǵyn úı kesheni qurylysynyń jobasy bekitilgen. Bul ispen jergilikti kásipker aınalysady. Kóriktendirilmegen aýmaqtarǵa polıtsııa, paıdalanbaǵan jer telimi úshin jer ınspektsııasy aıyppul salady.
