Pavlodarda 200-ge jýyq úıdi sý basyp jatyr
PAVLODAR. QazAqparat - Pavlodar bıýdjetinde qaladaǵy úılerdi basqan sýdan sorǵytýǵa arnalǵan vertıkaldy drenaj júıesin salýǵa qarjy qarastyrylǵan, dep habarlaıdy QazAqparat.
«Ia, bıýdjetten qazir vertıkaldy drenajdy júıe úshin arnaıy qarjy qarastyrylǵan. Bolashaqta atalmysh júıe káriz kollektoryna nemese jaqyn mańdaǵy karerge aınalady»,-dedi búgin tilshilerge Pavlodar qalasy ákiminiń orynbasary Aıan Beısekın.
Ekinshi Pavlodar shaǵyn aýdanynyń turǵyndary qazir qala bıliginen tótenshe jaǵdaı jarııalaýdy surap otyr. Óıtkeni oblys ortalyǵynyń shyǵys bóliginde 200-ge jýyq úıdi birneshe aptadan beri jerasty sýy alyp jatyr. Kommýnaldyq qyzmet ókilderi uńǵyma qazyp bergen. Bul uńǵyma sýdy sorǵytyp alýǵa múkindik berip otyr. Endi olarǵa jer astynan keletin sýdyń deıgeıin anyqtaý úshin onyń taǵy bireýin qazý kerek bolyp tur.
Bılik ókilderi ázirge turǵyndarǵa keltirilgen shyǵyn úshin ótemaqy tóleý-tólemeý jaǵyn aıtpaı otyr.
Eske salaıyq, mamyr aıynyń ortasyna taman Pavlodar qalasynyń 200-ge jýyq úıin sý alyp ketken bolatyn.
Turǵyndardyń aıtýynsha, jaǵdaıdyń bulaısha qalyptasýyna osydan 2 jylǵa jýyq ýaqyt buryn jer astynan keletin sýdy sorǵytatyn nasos stansysy jabylyp qalǵandyǵy sebep bolyp otyr. Qala turǵyndarynyń jertóleleri men baqshalaryn sý basyp ketken. Olar ózderiniń qarjysyna sý sorǵytatyn tehnıkaǵa tapsyrys berip, qajetti jerlerge topyraq tógýde.
Zeınetker Ýlıana Rybakovanyń aıtýynsha, sońǵy úsh jylda sý kólemi erekshe artqan. Buryndary sý kóterilgenimen, onyń qaıtýy da tez bolatyn, turǵyndar da baqshalaryna qajetti ósimdikterdi otyrǵyzyp úlgeretin. Bıyl sońǵy 50 jylda alǵash ret osy sharýashylyqpen aınalysýdyń múmkindigi bolmaı otyr.
