Pavlodarda 200-den astam páter turǵyny jylýsyz otyr

PAVLODAR. QazAqparat - Mının jáne Saltykov-Şedrın kóshelerindegi eki úıde turatyn pavlodarlyqtar qyrkúıek aıynyń sońynan beri páterlerine jylý berilmegenine shaǵymdandy, dep habarlaıdy «QazAqparat» HAA tilshisi. 

Mının kóshesindegi №40 úıdiń turǵyny Anastasııa Klevtsova páterinde jylý tek jylý maýsymynyń basynda ǵana bolǵanyn aıtty. Odan keıin tutas úıge jylý berilmegen.

«Kıimimizben uıyqtaımyz. Úıde ázirlengen tamaqtyń jylýymen jylynamyz. Bir bólmeli páterde turamyz. Zaldyń esigin jaýyp uıyqtaımyz. Keshe úı ishin plıtka men as daıyndaıtyn peshti qosyp jylyttyq», - deıdi ol.

Pavlodar ákimdiginiń baspasóz qyzmeti qalanyń turǵyn úı ınspektsııasy bul jaǵdaıdan habardar ekenin málim etti.

«Turǵyn úı ınspektsııasy jylý berilmegen úılerde birneshe ret boldy. Juma kúni arnaıy komıssııa oblystyq energetıka basqarmasynyń ókilderimen birge atalǵan úılerge baryp qaıtty. Bizge belgili bolǵandaı, osy úıler ornalasqan oblys ortalyǵyna jylý beretin pavlodardyq JES-1-de qandaı da bir jóndeý jumystary júrgizilip jatyr. Budan ózge úıge keletin jylýmen qamtý júıelerinde úıdi jylytýǵa qajetti parametrler tómendetildi. Mundaı jaǵdaılarda turǵyn úı ınspektsııasy  mekenjaılarǵa shyqqanda, ol «Pavlodar jylý júıeleri» JShS kelisimimen sheshim qabyldap, máseleni sheshedi», - dedi Pavlodar ákimdiginiń baspasóz hatshysy Saltanat Ákimbekova.