Pavlodarda 20 úı jáne birneshe áleýmettik nysan sýsyz qaldy
PAVLODAR. QazAqparat - Pavlodar qalasynda sý qubyry jaryldy. Qala bıligi apatty keshke deıin retteýge bel býyp otyr, dep habarlaıdy QazAqparat tilshisi.
«Qubyrdyń jarylýyna baılanysty qala ákimdigi «Pavlodar sý arnasy», «Pavlodar jylý jelileri», «Kommýnservıs» kommýnaldyq kásiporyndarymen birlesip, kópqabatty 20 úıge baratyn sýdy úzip tastady. Aqaýdy keshke deıin retteý josparlanǵan», - deıdi Pavlodar ákiminiń orynbasary Ermurat Nurhanov.
Sýsyz qalǵan úılerge aýyzsýdy kólikpen tasyp jetkizip jatyr. E. Nurhanovtyń sózine qaraǵanda, apat bolǵan jerde jóndeý jumystary júrgizilmegeli biraz bolǵan.
«Apattyń sebebin anyqtap jatyrmyz, barlyǵyn baqylap otyrmyz. Keshke deıin sýmen qamtý júıesi qalpyna keltiriledi dep oılaımyn. Úılerden tys, qubyr jarylǵan jerdiń ústinde ornalasqan balabaqsha, mektep, ekonomıka jáne quqyq kolledjine de sý berý toqtatyldy. Biraq jylýdy sóndirgen joqpyz», - deıdi ol.
Aqaýdy jóndeýge 30 tehnıka jumyldyrylǵan.
Avtor: Anton Gagarın
