Pavlodarda 20 kópqabatty úı jylýsyz qaldy
PAVLODAR. QazAqparat - Pavlodarda bolǵan iri apattan jıyrmadan astam úı jylýsyz qaldy, dep habarlaıdy QazAqparat tilshisi.
«Jylý júıeleri jaryldy», - dep habarlady qalalyq TKSh, jolaýshylar kóligi jáne avtomobıl joldary bóliminiń basshysy Zikirııa Sultanǵazınov. - Shamamen 20 úı jylýsyz qaldy. Ázirge jarylǵan jerdi izdestirip jatyr. «Pavlodar jylý júıeleri» JShS tehnıkasy jumys isteýde. Barlyq máseleni tezirek retteýge tyrysamyz».
Turǵyndardyń aıtýynsha, zardap shekken úılerdiń batareıasy sýyp úlgerdi. «Pavlodar jylý júıeleri» JShS apattyń naqty sebebin áli anyqtaǵan joq. Oqıǵa ornynda mamandar jumys istep jatyr. Kýágerlerdiń aıtýynsha, qala ortalyǵynda ekskavator, KamAZ, avtokran jáne apattyq brıgadanyń ózge de tehnıkalary - barlyǵy 9 arnaıy tehnıka jumyldyrylǵan.
«Dıametri 400 mm bolatyn qubyr jelisi jarylǵan. Ázirge 20 kópqabatty turǵyn úı jylýdan ajyratyldy», - dep habarlady «Pavlodarenergo» AQ baspasóz hatshysy Olesıa Emelıanova - Qazir jer qazý men jarylǵan tusty anyqtaý jumystary júrip jatyr».
