Pavlodarda 20-ǵa jýyq adamdy kene shaqqan

PAVLODAR. KAZINFORM - Ertis-Baıan óńirinde keneler belsene bastady. Kóktem bastalǵaly 19 adam, onyń ishinde bir bala jándiktiń shabýylyna ushyraǵan.

Óńirde kene shaqqan adamdar qatary kóbeıe túsken. Sáýir aıynyń basynan 19 adamdy shaqqan. Bul ótken jyldyń uqsas kezeńimen salystyrǵanda eki ese kóp.

- Bıyl kóktem erte shyqty. Tipti +5...+7 gradýs shamasyndaǵy temperatýranyń ózi keneler úshin qolaıly. Sondyqtan olar osy kezeńde belsendi bola túsedi. Ár adam óz qaýipsizdigi úshin saqtyq sharalaryn saqtaǵany jón. Máselen, tabıǵatqa shyǵar aldynda deneni tolyq jabatyn kıim kııý kerek. Sonymen qatar adamdar bir-birin teksergeni mańyzdy, óıtkeni bul keneni der kezinde baıqap, kıimnen alyp tastaýǵa múmkindik beredi. Mundaı tekserýdi ár 1-1,5 saǵat saıyn qaıtalap otyrǵan durys. Oǵan qosa, repellentterdi qoldanǵan abzal. Bul hımııalyq quraldar tek masa ǵana emes, kenelerden de qorǵanýǵa múmkindik beredi, - deıdi oblystyq sanıtarııalyq-epıdemıologııalyq baqylaý departamentiniń bas mamany Shahızada Turlybaeva.

Dárigerlerdiń aıtýynsha, kene shaqqanda adam boıynda dene qyzýynyń kóterilýi, álsizdik, syrqyrap aýyrý, bulshyqettegi aýyrsyný sııaqty belgiler baıqalady. Vırýstyq entsefalıt kezinde júrek aınýy, qusý sııaqty shaǵymdar da bolýy múmkin. Al ınfektsııa berilse lımfa túıinderi ulǵaıyp, denede bórtpeler paıda bolady. Kene entsefalıti sońǵy ret aımaǵymyzda ótken jyly tirkelgen. Bıyl ázirshe ondaı derek tirkelgen joq.

Eske sala keteıik, Qyzylorda oblysynda kenege qarsy óńdeletin eldi mekender sany azaıdy.