Pavlodarda 19 myń adam 589 mln teńgeniń kólik salyǵyn tólemeı júr
Osy jylǵy salyq raqymshylyǵynyń arqasynda jeke tulǵalardyń kólik quraldaryna tólegen salyq túsimderiniń kólemi 2 mıllıard teńgege jýyqtady. Ieleri salyq tólemegeni úshin úsh avtokólik aıyp turaǵyna qoıyldy.
Oblystyq memlekettik kirister departamenti sońǵy úsh jyl ishinde kólik salyǵyn tólemeýshiler sany aıtarlyqtaı azaıǵanyn atap ótti. Bul, eń aldymen, ósimpul men aıyppuldy joıýǵa ruqsat beretin salyq zańnamasyndaǵy ózgeristerge baılanysty bolyp otyr. Pavlodar oblysynda 11 myńnan astam salyq tóleýshi amnıstııany paıdalandy.
«Qazirgi kezde on toǵyz myń salyq tóleýshi óz kóligi úshin memleketke 589 mıllıon teńge qaryz, - dedi memlekettik kirister departamentiniń túsindirý jumysy basqarmasy basshysynyń mindetin atqarýshy Indıra Ábileva. – Ótken jyly bir AEK-ten astam qaryzy bar salyq tóleýshilerge 170 myń eskertý jiberildi. Sol kezeńdegi qaryzdyń somasy 1 mıllıonǵa jýyq edi. Jıyrma alty myń adam qaryzyn óz erkimen japty».
Memlekettik kirister departamenti tólenbegen salyqty óndirý maqsatynda jalpy somasy 527 mıllıon teńgeni quraıtyn 130 myń salyq buıryǵyn shyǵardy. Qujattardy jeke sot oryndaýshylaryna bermeı turyp, tórt myń salyq tóleýshi qaryzyn jaýyp úlgerdi. Sot oryndaýshylaryna berilgen toǵyz myń buıryq boıynsha 85,6 mıllıon teńge ǵana óndirildi.
Indıra Ábileva 2019 jyldyń qarasha-jeltoqsan aılarynda qaryzyn tóleýden qashyp júrgen tulǵalardy anyqtaý maqsatynda arnaıy reıd júrgizdi. Onyń qorytyndysy boıynsha memleketke tórt mıllıon teńgeden astam qaryzy bar 50 salyq tóleýshi anyqtalyp, birazy eki mıllıon teńgedeı qaryzyn japty. Salyq vedomstvosy Pavlodar oblysynyń turǵyndaryna salyq organdarynyń talaptaryn eskerip, tólemderdi ýaqtyly jasaýǵa keńes berdi.
