Pavlodarda 18 mln teńge jymqyrǵan «Qazaqstan sý joldary» fılıalynyń dırektory sottaldy

NUR-SULTAN. QazAqparat – «Qazaqstan sý joldary» kásipornynyń Pavlodar oblysyndaǵy fılıalynyń dırektory A.Z.Seıpyshev 3 jylǵa sottaldy, dep habarlaıdy QazAqparat tilshisi.

«Seıpyshev taýar-materıaldyq qundylyqtardy jetkizý boıynsha jalǵan sharttar jasaý jáne olardy odan ári esepten shyǵarý arqyly 18,7 mln teńge somasynda bıýdjet qarajatyn jymqyrdy degen kúdikke ilingen edi. Sot úkimimen Seıpyshev kináli dep tanylyp, oǵan 3 jylǵa bas bostandyǵynan aıyrý jazasy taǵaıyndaldy», - dedi Sybaılas jemqorlyqqa qarsy is-qımyl agenttiginiń birinshi departamentiniń aǵa tergeýshisi Danııar Bıgaıdarov agenttikte ótken baspasóz máslıhatynda.

Sottalǵan burynǵy dırektor ómir boıy memlekettik qyzmette qyzmet atqarý quqyǵynan aıyryldy.