Pavlodarda 16 myńnan astam adam tabıǵatty lastaǵany úshin jaýapqa tartyldy

PAVLODAR. KAZINFORM — Polıtseıler aımaq aýmaǵynan zańsyz 27 qoqys úıindisin anyqtaǵan. Úıindiler kóbine Pavlodar qalasynyń shetkeri bólikterinde ornalasqan.

Tártip saqshylary oblys aýmaǵynda paıda bolǵan zańsyz qoqys alańdaryna kináli tulǵalardy anyqtap, jaýapqa tartyp jatyr. «Taza Qazaqstan» ekologııalyq aktsııasy aıasynda óńirdiń sanıtarlyq jaǵdaıyn jaqsartý, qorshaǵan ortany lastaýǵa jáne ekologııalyq quqyq buzýshylyqtarǵa qatysty «nóldik tózimdilik» mádenıetin qalyptastyrý kózdelip otyr.

— Osy ýaqytqa deıin qoǵamdyq oryndardy lastaǵany jáne abattandyrý qaǵıdalaryn buzǵany úshin 16 myńnan astam pavlodarlyq ákimshilik jaýapkershilikke tartyldy. Jalpy sany 27 ruqsat etilmegen qoqys úıindisi anyqtaldy. Reıdtik is-sharalar barysynda polıtsııa qyzmetkerleri abattandyrý qaǵıdalaryn óreskel buzý derekterin anyqtady, — deıdi oblystyq polıtsııa departamenti qoǵamdyq qaýipsizdik basqarmasynyń bastyǵy Azamat Kúrkebaev.

Mysal úshin júk kóliginiń júrgizýshisi Pavlodar qalasynyń shetki bóliginde ornalasqan Kosmonavtar jáne Jibek joly kósheleriniń qıylysynda qurylys qaldyqtaryn zańsyz tókken. Atalǵan áreket qoldanystaǵy zańnama talaptaryna qaıshy keledi. Jınalǵan materıal protsessýaldyq sheshim qabyldaý úshin ekologııa departamentine joldanǵan.

Eske sala keteıik, Aqtóbe ekologtary qoqys polıgonyna jaýapty bolǵan merdigerdiń isin teksere almady.