Pavlodarda 14 myń adamǵa áleýmettik kómek kórsetildi
ASTANA. QazAqparat - Qazan aıynyń sońǵy jeksenbisinde Qazaqstanda Áleýmettik qorǵaý júıesi qyzmetkerleriniń kúni atalyp ótedi, dep habarlaıdy pavlodarnews.
Merekege oraı qala basshylyǵy Q. Ábýseıitov atyndaǵy mádenı-oıyn saýyq ortalyǵynda saltanatty is-shara uıymdastyrdy.
Pavlodar qalasynyń ákimi Ánýar Kúmpekeev áleýmettik sala qyzmetkerlerin kásibı merekemen quttyqtady. - Sizderdiń jumystaryńyz asa kúrdeli, - deıdi Ánýar Kúmpekeev. - Prezıdentimiz turǵyndardyń aldyndaǵy áleýmettik mindetterdi oryndaý basty maqsatymyz ekendigin jıi aıtady. Sizderdiń jumystaryńyzdyń arqasynda Pavlodarda barlyq áleýmettik mindetter tolyǵymen oryndalyp keledi. Barlyqtaryńyzǵa zor densaýlyq, otbasylaryńyzǵa qut-bereke tileımin. Ári qaraı qala ákimi úzdik áleýmettik qyzmetkerlerge qurmet gramotalary men alǵys hattar tabys etti. Olardyń arasynda memlekettik qyzmetshiler, úkimettik emes uıymdardyń ókilderi bar.
Sonymen birge, áleýmettik qyzmetkerlerdi tól merekesimen quttyqtaǵan qalalyq máslıhattyń hatshysy Záýresh Muqasheva men oblystyq máslıhattyń depýtaty Elına Paýlı de birqatar mamandardy alǵys hattarmen marapattady. Qalalyq jumyspen qamtý jáne áleýmettik baǵdarlamalar bóliminiń basshysy Gúlbaram Bilálevanyń aıtýynsha, jalaqynyń tómendigine qaramastan, áleýmettik qyzmetkerler birinshi kezekte adamdarǵa kómektesýdi oılaıdy.
Jalaqymyz tómen ekendigi ras - 40 myńnan 80 myń teńgege deıin, - dep aǵynan jaryldy Gúlbaram Biláleva. - Solaı bola tura kómekke zárý jandarǵa qol ushyn beretin áriptesterime alǵys aıtamyn. Bizde jalǵyzbasty zeınetkerlerge qyzmet kórsetetin 123 áleýmettik qyzmetkerimiz bar. Olar kúndelikti qarttarǵa azyq-túlik, dári-dármek alyp berip, úılerin jınastyrý sııaqty istermen aınalysady.
Búgingi kúni Pavlodarda 300-den astam áleýmettik sala qyzmetkeri jumys isteıdi. Olar múmkindigi shekteýli jandarǵa, jalǵyzbasty zeınetkerler men ózge de kómekke zárý turǵyndarǵa járdemdesedi. 2018 jyly qalamyzda 14 myńǵa jýyq adamǵa jalpy somasy 220 mıllıon teńgeden astam kómek kórsetildi.
