Pavlodarda 13 jasar qyzdy ıterip jibergenderge qatysty qylmystyq is qozǵaldy

PAVLODAR. KAZINFORM — Pavlodar polıtsııasy jasóspirim qyzdy keýdesinen ıterip, denesine jeńil jaraqat salǵan eki jas jigitke qatysty qylmystyq is qozǵady. 13 jasar oqýshy oblys ortalyǵyndaǵy № 26 mektepte oqıtyny belgili bolyp otyr.

Mektep ákimshiliginen málim etkendeı, Besqaraǵaı kóshesinde qurbysymen kele jatqan oqýshy qyz kóliktiń aldynan kese-kóldeńeń ótken. Buǵan ashýlanǵan kólik júrgizýshisi men onyń serigi atyp shyǵyp, qyzdy keýdesinen ıterip jibergen. Bul oqıǵadan qatty shoshyǵan jasóspirimge jedel járdem qajet bolǵan. 

«Oqýshy qazirgi ýaqytta aýrýhanada em qabyldap jatyr. Zańdy ókiliniń qatysýmen qyzben sóılesip, jubattym. Oǵan eshkim qaýip tóndire almaıtynyn jetkizdim. Fızıkalyq turǵydan qyz ózin jaqsy sezinedi. Biraq onyń psıhoemotsıonaldyq jaǵdaıy mamandardyń kómegin qajet etedi. Bul iske arnaıy mamandar, sonyń ishinde mektep psıhology da jumyldyryldy. Anasynyń aıtýynsha, synyp jetekshisi de únemi baılanysta», — deıdi balalar ombýdsmeni Sáýle Shákenova.

Pavlodar oblystyq polıtsııa departamentiniń baspasóz qyzmeti qyzdyń densaýlyǵyna jeńil jaraqat keltirgeni úshin eki jas jigit ustalyp, olarǵa qatysty qylmystyq is qozǵalǵanyn jetkizdi. Qazirgi ýaqytta tergeý sharalary júrgizilip, oqıǵanyń mán-jaıy anyqtalyp jatyr.

Eske sala keteıik, Pavlodarda kolledj stýdenti oqytýshyǵa pyshaq jaraqatyn salǵan bolatyn.