Pavlodarda 13 myńnan astam adam onkologııalyq aýrýǵa shaldyqqan

PAVLODAR. KAZINFORM - Pavlodar oblystyq onkologııalyq dıspanserge jyl saıyn kemi 2,5 myń adam esepke turady. Obyr aýrýlarynyń statıstıkasy boıynsha aımaq respýblıkadaǵy alǵashqy tórttikke kirgen. 

Onkologııalyq aýrýlardyń qurylymy boıynsha alyp qarasaq, kollorektaldy qaterli isikke shaldyqqandar kósh bastap tur. Odan soń sút bezi obyry, ókpe, asqazan, jatyr moınynyń qaterli isikteri de kóbeıip keledi.

«Jyl saıyn oblystyq dıspanserge 2,5 myń adamdaı tirkeledi. Byltyr obyr derti bar 1200 adamǵa ota jasaldy. Kóbine shaǵyn ınvazııalyq ádispen jasalady. Mundaı tásil emdelýshiniń tezirek aıaqqa turyp ketýine kómektesedi. Onkologııamen aýyratyn naýqastar sany boıynsha Pavlodar oblysy tórtinshi oryndamyz, bizdiń aldymyzda Soltústik Qazaqstan, ShQO jáne Qostanaı oblystary bar. Qaterli isikti erte bastan anyqtaýǵa kúsh salyp jatyrmyz. Sonyń nátıjesinde dertti emdeýdiń «altyn ýaqytyn» ótkizip alǵandardyń qatary 10 paıyzǵa kemidi», - deıdi óńirlik onkologııalyq dıspenserdegi uıymdastyrý-ádistemelik bólimshesiniń meńgerýshisi Ásel Asqarova.

Keıbir otalardy kúrdeli bolǵanyna oraı biregeı dep ataýǵa turarlyq. Byltyr mamyr aıynda hırýrgter bir naýqasqa ishektegi bitelis dıagnozy boıynsha ota jasaý kezinde ish qurylysynan qaýipti isik tapqan. Ony sylyp tastaý múmkin bolmaǵan. Keıin naýqas hımııalyq terapııa qabyldaǵan soń onkolog dárigerge ota jasaý úshin qaıtara jiberilgen. Bul joly mamandar kúrdeli quramdastyrylǵan ota júrgizgen, sebebi isik ash ishek pen búırekterge jabysyp óse bastapty.

Dárigerler ota barysynda emdelýshiniń toq ishegi men ash isheginiń, búıreginiń bir bóligin kesip alyp tastaýǵa, ishek tútikshesin qalpyna keltirýge májbúr bolǵan. Pavlodarlyq turǵyn keshe ǵana dıspanserden úıine jiberilgen.