Pavlodarda 13 kósheniń aty ózgermek
«Kolos» ortalyǵynda Pavlodar qalasynyń keıbir kóshelerin qaıta ataý máselesi boıynsha kóshpeli tyńdaý ótti. Tyńdaýǵa qoǵamdyq keńes músheleri, qurmetti azamattar, ardagerler, qala turǵyndary, qalalyq máslıhat depýtattary, atqarýshy organ jáne BAQ ókilderi shaqyrylǵan. Tyńdaý barysynda Pavlodar qalasy ákiminiń orynbasary Svetlana Gladysheva kóshe ataýlaryn ózgertý boıynsha túsken usynystardy atap ótti. Onyń aıtýynsha, S.Toraıǵyrov atyndaǵy PMÝ ǵalymdary men professorlarynan Dımıtrov kóshesin – Júsipbek Aımaýytov, 1 Maı – Máshhúr Júsip, Karl Marks – Álıhan Bókeıhan, Kırov – Ermahan Bekmahanov, Korolenko – Buqar jyraý, J.Aımaýytov – Aqjol, M.J.Kópeev – Aqbettaý, Bestýjev – Shákárim Qudaıberdıev ataýlaryna aýystyrý týraly usynys túsken. Sondaı-aq Qazaqstan Jazýshylar odaǵy Pavlodar oblystyq fılıalynyń dırektory Arman Qanıdan Volodarskıı kóshesin – Jeltoqsan, Bolshaıa Obezdnaıa – Jibek joly dep ataý, qalalyq zııaly qaýym ókilderinen, «Jebe» qoǵamdyq birlestiginiń tóraǵasynan jáne Pavlodar qalasynyń Qurmetti azamaty Sholpan Baıǵalydan Krýpskaıa kóshesin – Edige bı, Saǵadat Nurmaǵambetov atyndaǵy qordyń dırektorynan Chkalov kóshesin – Saǵadat Nurmaǵambetov atyna berý, oblystyq ardagerler keńesinen Pahomov kóshesin – Qabdesh Nurkın atymen ataý týraly usynys túsken.
«Biz memleket basshysy Qasym-Jomart Toqaevtyń tapsyrmasymen Pavlodar qalasyndaǵy onomastıkalyq jumystardy jalǵastyrýdamyz. Bıyl jeke jáne zańdy tulǵalardan oblys ákiminiń, Pavlodar qalasy ákiminiń atyna túsken ótinishterdi qarastyrý úshin barlyq qujattar qalalyq máslıhatqa jiberildi. Atalǵan ıdeologııalyq turǵydan eskirgen kóshe ataýlaryn aýystyrý memleketimizdiń qalyptasýyna úlesin qosqan tarıhı tulǵalarymyzdyń esimin jańǵyrtýǵa múmkindik beredi. Oǵan qosa, quramynda ózge ult ókilderi bar turǵyndarǵa bundaı tulǵalarmen tanysýǵa múmkindik berip, halyq arasynda jarasym tabýǵa úlesin tıgizedi. Sondyqtan bul sheshimimizdi qoldaýdy suraımyn», - dedi Svetlana Gladysheva.
Eńbek ardageri, zańger jáne quqyq qorǵaýshy bolǵan Boranbaı Ysqaqov 13 kósheniń ataýyn ózgertý týraly bastamany qoldaıtynyn aıtty. «Álem tarıhy – uly tulǵalardyń bıografııasy. Kóshe, saıabaqtardyń ataýy – biz turatyn óńir jaıly málimet beretin qural. Búgin 1 mamyr kóshesi týraly basqasha oılar aıtylýda. Biz bundaı merekelerdi toılap óskenimiz belgili. Biraq ıdeologııa, memlekettiń qoǵamdyq qurylymy ózgerdi. Áleýmettiń logıkasy bundaı datalardy qabyldamaıdy. Sondyqtan zańǵa qarsy kelgen eshteńesi joq dep oılaımyn. Keler jyly fashızmdi jeńgenniń 75 jyldyǵyn barlyǵy toılaıdy. Tarıhqa, jeńiste generaldyń da, qatardaǵy jaýyngerdiń de orny birdeı. Sondyqtan Pavlodar qalasynyń kósheleriniń birinde general Saǵadat pen qatardaǵy jaýynger Qabdeshtiń aty turýy – quptarlyq is. Men bul kóshelerdiń ataýy ózgertilýin qoldaımyn», - dedi Boranbaı Ysqaqov.
Qalalyq №17 mekteptiń matematıka pániniń muǵalimi Aleksandr Dotsıýk Korolenko kóshesinde týyp-ósken. «Men úshin osyndaı sharaǵa qatysý – mártebe», - dedi Aleksandr Dotsıýk. «Osy qalada, Korolenko kóshesinde týyp, sol kóshede óstim. Balalyq shaǵym ótti. Qazaqstan – jas memleket. Ósip jatqan urpaq tarıhyn, batyrlaryn bilýi kerek. Korolenko kóshesine Buqar jyraý atyn berý ózekti dep sanaımyn. Ol tek jyraý bolmaı, Abylaı hanǵa aqyl aıtqan. Han onyń aqylyn tyńdaǵan. Osyndaı bedeli zor tulǵanyń esimi qalamyzda bolýy tıis».
Tyńdaý nátıjelerin eskere kele, qalalyq máslıhattyń turaqty komıssııalarynyń 8 depýtaty biraýyzdan sheshimdi qoldap daýys berdi.
Aıta keteıik, endi Qazaqstan zańnamasymen ornatylǵan merzimde tıisti qujattar respýblıkalyq onomastıkalyq komısııanyń qaraýyna jiberiledi.