Pavlodarda 125 mln teńgege satyp alynǵan úı turýǵa jaramsyz bolyp shyqty
ASTANA. KAZINFORM — Pavlodar oblysynyń Aqqýly aýdanynda bıýdjet qarjysyna 125 mln teńgege satyp alynǵan segiz páterli úıden qurylys talaptarynyń óreskel buzylǵany anyqtaldy. Qazir bıýdjet qarajatyn qaıtarý jáne kináli laýazymdy tulǵalardy jaýapkershilikke tartý jumystary júrgizilip jatyr. Bul týraly óńirdegi prokýratýra málim etti.
Talap aryzyn engizýge deıin Aqqýly aýdanynyń prokýratýrasy sáýlet, qurylys, jer jáne turǵyn úı zańnamasynyń saqtalýyna tekserý júrgizdi.
2024 jylǵy jeltoqsanda jergilikti atqarýshy organ jeke tulǵalardan 125 mln teńgege 8 páterli turǵyn úıdi satyp alǵan. Bul úıge turǵyn úı alý kezeginde turǵan aýyl turǵyndaryn ornalastyrý josparlanǵan.
— Nysandy tekserý barysynda qurylys kemshilikteri men turǵyndardyń onda turýyna múmkindik bermeıtin zań buzýshylyqtar anyqtaldy, — delingen habarlamada.
Jalpy, qurylys eldi mekenniń egjeı-tegjeıli josparlaý jobasyna sáıkes kelmegen. Sonymen qatar qurylys jumystary sáýlet-josparlaý tapsyrmasyn almaı turyp bastalǵan.
Zańnamaǵa sáıkes, nysan kóppáterli turǵyn úıge jatqyzylǵan. Osyǵan baılanysty jobalaý-smetalyq qujattama ázirlenip, oǵan saraptama júrgizilýi tıis bolǵan.
Jobany iske asyrý kezinde avtorlyq jáne tehnıkalyq qadaǵalaý júrgizilmegen. Úıdiń irgetasy men negizgi konstrýktsııalary talapqa saı salynbaǵany anyqtaldy. Bul bolashaq turǵyndardyń turý jaǵdaıyna aıtarlyqtaı keri áser etýi múmkin.
Prokýratýra qabyldaǵan sharalar azamattardy talapqa saı emes turǵyn úıge ornalastyrýdyń aldyn alýǵa múmkindik berdi.
Qazirgi ýaqytta bıýdjet qarajatyn qaıtarý jáne kináli laýazymdy tulǵalardy jaýapkershilikke tartý boıynsha jumystar júrgizilip jatyr.
