Pavlodarda 12 jasar balany poıyz qaǵyp ketti
PAVLODAR. QazAqparat - «Pavlodar - Astana» baǵytyndaǵy elektr poıyzy 12 jasar balany qaǵyp ketken. Jaraqattanǵan jetkinshek oblystyq balalar aýrýhanasyna jetkizildi, dep habarlaıdy pavlodarnews.kz.
Kýágerlerdiń aıtýynsha, ul bala qulaqqap kıip alyp, jaıaý júrginshiler ótetin joldyń rettelmeıtin tusynan, Hromzaýyt aýdanyndaǵy sońǵy aıaldamanyń janynda ótip bara jatqan. Sol sátte burylystan «Pavlodar - Astana» baǵytyndaǵy elektr poıyzy shyǵa kelgen. Soqqy saldarynan bala shetke qulap, joldardyń arasyna túsken. Abyroı bolǵanda, tiri qalǵan.
«Ol jedel járdem arqyly 17 naýryz kúni bizdiń aýrýhanaǵa saǵat 15.30-da jetkizildi», - deıdi oblystyq balalar aýrýhanasy bas dárigeriniń orynbasary Irına Orsagosh. - Jasóspirimniń bas mıy jaraqat alyp, alaqan jáne bet súıekteri synǵan. Qazirgi tańda jaraqat bóliminde neırohırýrg dárigerdiń baqylaýynda». Aq jeleńdiler balanyń jaǵdaıyn ortasha aýyr dep baǵalaýda. Balanyń ómirine eshbir qaýip tónip turǵan joq.
