Pavlodarda 12 azamat KSRO tólqujatymen turyp kelgen

PAVLODAR. KAZINFORM - Pavlodar oblysynyń kóshi-qon qyzmeti 1974 jylǵy úlgidegi KSRO pasportymen turyp kelgen turǵyndardy anyqtady. Olardyń deni – erterekte TMD elderinen kóship kelgen azamattar.

Ertis-Baıan óńiriniń polıtseıleri QR azamatynyń jeke basyn kýálandyratyn qujattardy ýaqtyly almaǵan jáne 18 jasqa tolǵanda tıisti qujattalmaǵan adamdardy anyqtady. Olardyń keıbiri eski keńestik tólqujatpen ómir súrip kelgen.

- Jyl basynan KSRO úlgisindegi eski tólqujatpen júrgen 12 pavlodarlyq anyqtaldy. Buǵan qosa 18 jasqa tolsa da jeke kýálik resimdemegen 20 azamat, sondaı-aq azamattyǵy joq, biraq kýálik resimdemegen 8 turǵyn anyqtaldy. Olardyń barlyǵyna tıisti qujattary jasaldy. Qujaty joq adamdardyń deni TMD-daǵy ózge memleketterden kelgender, olar sol eldiń jaramdylyq merzimi ótken tólqujatymen júrgen. Kóbi KSRO-nyń burynǵy odaqtas memleketterinen kámelet jasyna tolmaı turyp Qazaqstanǵa kóship kelgen, - deıdi Pavlodar oblysy polıtsııa departamenti kóshi-qon qyzmetiniń bastyǵy Dáýlet Ysqaqov.

Atalǵan azamattardyń tıisti qujaty bolmaǵandyqtan olar osy ýaqytqa deıin túrli járdemaqylardan qaǵylyp, memlekettik qyzmetterdi alýdan qıyndyq kórip kelgen.

Eske sala keteıik, pavlodarlyq polıtseıler úsh kúnde kóshi-qon zańnamasyn buzýǵa qatysty 145 derek tirkedi.