Pavlodarda 11 myńǵa jýyq adam júrek jetkiliksizdigimen esepte tur

PAVLODAR. KAZINFORM — Dárigerler bul derttiń jyldan jylǵa «jasaryp» bara jatqanyn aıtady. Buǵan eń aldymen, turǵyndardyń óz densaýlyǵyna salǵyrt qaraýy sebep.

Ertis-Baıan óńirinde 11 myńǵa jýyq adam sozylmaly júrek jetkiliksizdigi dıagnozymen dıspanserlik esepke alynǵan. Mamandardyń sózinshe, júrek jetkiliksizdigi kóbine uzaq ýaqyt eskerýsiz qalǵan gıpertonııa men ınfarkttiń, sondaı-aq qant dıabetiniń saldarynan týyndaıdy. Al aldyn alýdyń eń tıimdi joly — der kezinde júrek saýlyǵyn tekserý. Óńirde sozylmaly aýrýlar kesheni boıynsha medıtsınalyq kómekti jetildirý jónindegi jol kartasy ázirlendi. Onyń aıasynda arnaıy kabınetter ashylǵan.

— Sozylmaly júrek jetkiliksizdigi — júrek aýrýynyń asqynǵan satysy, ıaǵnı, júrek aǵzaǵa qajetti qan men ottegini tolyq kólemde jetkize almaıdy. Sonyń saldarynan tinder men múshelerge qorektik zattar jetispeı, búkil aǵzada gıpoksııa damıdy. Naýqastar bul derttiń belgilerin birden baıqaı bermeıdi. Kóp jaǵdaıda dárigerge kesh júginedi. Aýrýdyń negizgi belgileri — entigý, júrek yrǵaǵynyń buzylýy, aıaq-qoldardyń isinýi, moıyn kóktamyrlary keńeıip, álsizdik pen tez sharshaý, — deıdi kardıolog-dáriger Aıgerim Rahımova.

Dárigerler júrek-qantamyr júıesiniń aýrýlary búginde jasarǵanyn aıtady. Buryn mundaı dıagnoz 50 jastan asqan adamdarǵa jıi qoıylsa, qazir 30 jastaǵy, tipti odan da jas naýqastar jıi tirkeledi.

Eske sala keteıik, ShQO-da polıtseıler júrek talmasyna ushyraǵan zeınetkerdi qutqaryp qaldy.