Pavlodarda 103 brıgadasy áıeldi jedel járdem kóliginde bosandyryp aldy

PAVLODAR. KAZINFORM – Ana men dúnıege kelgen sábı Aqsý qalalyq aýrýhanasyna jetkizilgen. 

Bul týraly óńirlik jedel járdem stansasynan habarlandy.

– 5 tamyz kúni saǵat 10.23-te jedel járdem pýltine Baıanaýyl – Pavlodar tas jolyndaǵy kólikte 32 jastaǵy júkti áıeldiń kele jatqany, ony tolǵaq qysqany týraly habar kelip tústi. Kómekke dereý medıtsınalyq brıgada jiberildi. Shaqyrý túskennen keıin 10 mınýt ishinde patsıent áıel reanımobılge ornalastyryldy. Medıtsınalyq qyzmetkerler ony aýrýhanaǵa jetkizý týraly sheshim qabyldap, statsıonarǵa aldyn ala habar bergen. Alaıda jolda áıelde jyldam bosaný protsesi bastalyp ketken. Saǵat 10.55-te salmaǵy shamamen 2,9 keli, boıy 48 santımetr qyz bala dúnıege keldi, - dep málimdedi jedel járdem stansasynan.

Jedel járdemniń feldsherlik brıgadasy jylý tizbegin saqtap, ana men sábıdi Aqsý qalalyq aýrýhanasynyń dárigerlerine tapsyrǵan. Qazirgi ýaqytta olardyń ómirine jáne densaýlyǵyna eshqandaı qaýip joq.

Buǵan deıin Almaty polıtseıleri qyzmettik kólikte áıeldi bosandyryp alǵany týraly jazǵanbyz.