Pavlodarda 101 jastaǵy soǵys ardageri sotta óz múddesin qorǵady
PAVLODAR. QazAqparat - Pavlodarda «Mobıldi sot» 101 jastaǵy soǵys ardageriniń talabyn qanaǵattandyrdy, dep habarlaıdy QazAqparat Pavlodar oblystyq sotynyń resmı saıtyna silteme jasap.
«Sharbaqty aýdandyq soty «Mobıldi sot» qosymshasy arqyly óz betimen salynǵan qurylysqa jáne jer ýchaskesine menshik quqyǵyn taný týraly azamattyq isti qarap, qanaǵattandyrdy», - delingen habarlamada.
Sotqa Sharbaqty aýylynyń turǵyny, Uly Otan soǵysynyń ardageri jáne múgedegi Efım Emelıanovıch Petrenko júginip, óz kúshimen salǵan qurylysqa jáne jer ýchaskesine menshik quqyǵyn taný jóninde talap aryzyn jetkizgen.
Ardager óziniń jasyna qaramastan, mobıldi qosymsha arqyly úıde otyryp, óziniń zańdy múddesin qorǵady.
Sondaı aq, búgin Efım Emelıanovıch 101 jasqa toldy. Sot qyzmetkerleri atalǵan jaǵdaıdy paıdalana otyryp, ardagerdi týǵan kúnimen quttyqtap, myqty densaýlyq, otbasyna bereke tiledi.
