Pavlodarda 100-ge jýyq zańsyz qoqys oryndary anyqtaldy
PAVLODAR. KAZINFORM — Zańsyz qoqys úıindileri úshin 9 quqyq buzýshy ákimshilik jaýapkershilikke tartylǵan. Salynǵan aıyppuldardyń somasy 2 mln teńgeden asqan.
Oblysta qoqysty kez kelgen jerge tastap ketetinderdiń beıbastaq áreketteri tyıylmaı tur. Jyl basynan osyndaı 97 jaǵdaı tirkelgen.
Óńirlik ekologııa departamentiniń mamandary ekologııalyq zańnama talaptaryn buzýshylyqtardyń aldyn alýǵa, anyqtaýǵa jáne jolyn kesýge baǵyttalǵan is-sharalar aıasynda ruqsat etilmegen qoqys úıindilerin joıǵan.
— Ǵaryshtyq monıtorıngtiń arqasynda jyl basynan beri osyndaı 97 nysan anyqtalyp, onyń 93-i joıyldy. Qoqysty zańsyz úıgeni úshin 9 quqyq buzýshy ákimshilik jaýapkershilikke tartylyp, salynǵan aıyppuldardyń somasy 2 mln teńgeden asty, — deıdi Pavlodar oblysy boıynsha ekologııa departamenti basshysynyń orynbasary Áset Syzdyqov.
Jalpy jyl basynan beri departament mamandary memlekettik ekologııalyq baqylaý salasynda 40 is-shara ótkizilip, onyń barysynda ekologııalyq zańnama talaptaryn buzýdyń 54 deregin anyqtaǵan. Buzýshylyqtardy joıý týraly 25 nusqama berilip, jalpy somasy 105 mln teńgeden astam qarajatqa 106 ákimshilik aıyppul salynǵan.
Eske sala keteıik, Pavlodarda zańsyz qoqyspen belsendi kúresetinderdiń qoqysy tegin shyǵarylady.
