Pavlodarda 10 kúnnen soń jylý sóndiriledi
PAVLODAR. KAZINFORM — Oblys ortalyǵyndaǵy jylý jelilerin synaqtan ótkizý 15 sáýirden bastalady.
Bıyl óńirde 16,1 mlrd teńgege 31 shaqyrymnan astam jelini jańartý josparlanyp otyr.
Pavlodar oblysynyń úsh qalasynda 10 kúnnen soń ortalyqtandyrylǵan jylý óshirilip, jelilerde temperatýralyq jáne gıdravlıkalyq synaqtar bastalady.
— Pavlodar qalasynda eń joǵary temperatýralyq synaqtar 15 sáýirden, beriktikke synaý 24 sáýirden bastalady. Ekibastuzda temperatýralyq synaqtar 15 sáýirden, gıdravlıkalyq synaqtar 17 sáýirden josparlanǵan. Al Aqsýda temperatýralyq synaqtar 16 sáýirden bastap, gıdravlıkalyq synaqtar 21 sáýirden bastap júrgiziledi. Jylytý maýsymy aldyndaǵy synaqtar 28 shildeden 6 tamyz aralyǵynda josparlanǵan, — dep habarlady óńir ákiminiń baspasóz qyzmetinen.
Jalpy oblysta 2024-2025 jyldardaǵy jylytý maýsymy shtattyq rejımde ótken. Apattyq jaǵdaılar oryn alǵan joq. Buǵan negizinen óńirde qatty aıazdardyń bolmaýy oń áser etken. Turǵyndardyń jylýǵa qatysty shaǵymy 55%-ǵa azaıǵan.
Energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıpovtyń aqparaty boıynsha óńir turǵyndaryn sapaly jylýmen qamtamasyz etý úshin, sondaı-aq, aldaǵy jylytý maýsymynda jylý jelilerindegi gıdravlıkalyq jáne temperatýralyq rejımderdi jaqsartý úshin 16,1 mlrd teńgege 31 shaqyrymnan astam jelini jańartý josparlanýda. Pavlodarda № 5 sorǵy stantsııasyn salý, 5 km magıstraldyq jylý jelilerine, 10,6 km oram ishindegi jelilerge kúrdeli jóndeý júrgizý kózdelgen. Ekibastuzda JM-2 jáne JM-7 qaıta jańartylady jáne jylý jelileri kúrdeli jóndeýden ótedi. Aqsý qalasynyń № 3, 5, 8 shaǵyn aýdandarynyń kvartal ishindegi jylý jelileri qaıta jańartylyp, jylý jelilerine kúrdeli jóndeý júrgiziledi. Oblystyń energııa kózderinde 46 negizgi jabdyqty jóndeý, 394 derbes jáne ortalyqtandyrylǵan qazandyqtardy jóndeý jumystary josparlanǵan.
Eske sala keteıik, Ertis-Baıan óńirindegi jylý jelileriniń 79,7%-y tozyp tur.