Pavlodarda 1,5 mln teńge alıment tólemegen adam sottaldy
ASTANA. QazAqparat - Pavlodar oblysynyń kámelettik jasqa tolmaǵandardyń isi jónindegi mamandandyrylǵan aýdanaralyq soty uzaq ýaqyttyń ishinde alǵash ret alıment tóleýden jaltarǵan azamatty bas bostandyǵynan aıyrdy, dep habarlaıdy pavlodarnews.kz .
Oblystyq sottyń baspasóz hatshysy Aıgerim Súleımenovanyń aıtýynsha, alıment boıynsha jınalyp qalǵan qaryz 1,5 mln teńgeni quraıdy. Sonymen qatar er adam buǵan deıin asa aýyr qylmys jasaǵany úshin sotty bolǵan jáne tıisti merzimniń jartysyn ótep, jaqsy tártibi úshin bostandyqqa shyqqan. Ol balasyna kómektesýge múmkindigi bola tura óziniń tapqan tabysyn býkmekerlik keńsege jumsap kelgen.
«Sot úkimimen er adam qylmys jasaǵany úshin QR QK-niń 139-baby boıynsha kináli dep tanylyp, 2 jyl tórt aıǵa bas bostandyǵynan aıyrý túrinde jaza taǵaıyndaldy», - dedi Aıgerim Súleımenova. Bereshegi bar áke sot zalynda qamaýǵa alyndy. Sot úkimi zańdy kúshine tolyq engen joq.
