Pavlodar jylý elektr ortalyǵyna TMD-da teńdesi joq jańa tehnologııa engizilgen
Oblys ákimdigi baspasóz qyzmetiniń Telegram paraqshasyndaǵy málimetke sensek, QR Energetıka mınıstri Nurlan Noǵaev Pavlodar oblysyna jumys saparymen keldi. Óńir basshysy Ábilqaıyr Sqaqov ekeýi 1 qarashada Pavlodarda eki jylý elektr ortalyǵynda, Pavlodar munaı-hımııa zaýytynda jáne «Neftehım LTD» JShS-de bolǵan.
«Qazaqstan alıýmınııi» AQ quramyna kiretin 1-JEO-da olarǵa qalany elektrmen jáne jylýmen jabdyqtaý týraly aıtyldy. Stantsııanyń qazirgi elektr qýaty – 340 MVt, al jylý qýaty - saǵatyna 1074 Gkal. Kásiporynnyń áleýmettik bastamalary týraly da sóz boldy.
- Bizdiń joǵary oqý ornymyz – Toraıǵyrov ýnıversıtetinde energetıkterdi daıarlaıdy, olardyń kóbi bizge jumysqa ornalasady. Barlyq jas mamandy qosymsha oqytamyz, olardy barynsha qoldaýǵa tyrysamyz, - dedi 1-JEO bastyǵy Ilıa Rojkov.
«Pavlodarenergo» AQ bólimshesi 3-JEO-da Nurlan Noǵaev pen Ábilqaıyr Sqaqovqa negizgi jabdyqtardy modernızatsııalaý týraly baıandaldy. Mysaly, bıyl energetıkter №6 týrbınany qaıta qurdy.
TMD-da teńdesi joq jańa tehnologııa arqasynda kásiporyn ǵımaraty irgetasynyń buzylýyna ákeletin vıbratsııadan qutyldy.
- №6 týrbınada Qazaqstanda alǵash ret jabdyqtyń jumysy týraly barlyq derekterdi onlaın rejımde biryńǵaı pýltke jiberýge múmkindik beretin boljamdaý júıesi ornatylǵan. Eger qandaı da bir kórsetkish ózgerse, júıe qurylǵynyń jóndeýge tıis ýaqytyn birden anyqtap beredi. Bul modernızatsııa jumysyn ýaqtyly josparlaýǵa múmkindik beredi,- dedi «Pavlodarenergo» AQ basshysy.
Jylý elektr ortalyǵynan qalaǵa jylý berý búgin shtattyq rejımde júrip jatyr. Kásiporyn qoımalaryndaǵy kómir qory - 200 myń tonna (normatıv boıynsha 70 myń tonna).
«Neftehım LTD» JShS bazasynda energetıka mınıstri jáne Pavlodar oblysynyń ákimi metıltretbýtılefır jáne polıpropılen óndirý tsehtarynda boldy.
Bıyl zaýyt polıpropılen shyǵarý kólemin 40 myń tonnaǵa deıin jetkizýdi josparlap otyr. Ótken jáne burynǵy jyldary bul kórsetkish shamamen 33 myń tonnany quraǵan bolatyn.
Polıpropılennen bıg-beg - kólemi 1 tonnalyq úlken qaptar jáne basqa da ydystar óndiriledi.
Pavlodar munaı-hımııa zaýytynyń aýmaǵynda qonaqtar ortalyq basqarý pýlti men oqý ortalyǵyn aralady.
«PMHZ» JShS ókilderi 2017 jyly óndiristi jańǵyrtqannan keıin kásiporynda ónim sapasyn K-4 jáne K-5 standarttaryna deıin jaqsartyp, munaı óńdeý tereńdigin 76%-dan 87%-ǵa deıin arttyrǵanyn aıtty.
