Pavlodar jurty Sháken Aımanovtyń esimin kınoteatr mańdaıshasynan alyp tastaǵanyna narazy
PAVLODAR. KAZINFORM — Pavlodarda Sháken Aımanovtyń esimin ıelenip kelgen kınoteatrdyń ataýy bir-aq kúnde ózgerip shyǵa keldi. Jańa kompanııa Aımanov ataýyn alyp tastap, óz brendterin ornatyp qoıǵan.
«Sháken Aımanov kınoteatry» uzaq jyldar boıy qala turǵyndary men qonaqtarynyń súıikti mádenı oshaǵyna aınalyp kelgen. Ókinishke qaraı, toqyraý jyldary kınoteatrdyń jumysy toqtap, ǵımarat qańyrap qalady. 2000-jyldardyń basynda ony jeke kásipker satyp alyp, jóndep zamanǵa saı kınoteatrǵa aınaldyrady. Osylaısha, «Sh.Aımanov kınoteatry» ataýymen 20 jyldan astam tolassyz qyzmet kórsetip kelgen kásip ıesi ǵımaratty jaqynda «G Cinema Park» kınoteatrlar jelisine jalǵa bergen.
Al jańa kompanııa ǵımarattyń tóbesine «G Cinema Park» dep jazyp, Aımanov esimin alyp tastaǵan.
Uzaq jyldar boıy kınorejısserdiń esimin ıelenip kelgen ǵımarat ataýynyń bir kúnde ózgerip shyǵa kelgeni jergilikti qoǵamǵa unamaı otyr. Rýhanı qundylyqtan buryn kommertsııalyq múddeni alǵa qoıǵan bul sheshim ulttyq ónerge jasalǵan qurmetsizdik retinde qabyldanýda. Óńir jurtshylyǵy mádenı nysanǵa Sháken Aımanovtyń esimin qaıtarýdy talap etedi.
Jergilikti zııaly qaýymnyń pikirinshe, zamanaýı brendter men kommertsııalyq ataýlar ulttyq tulǵalardyń izin óshirmeýge tıis.
Kópshilik jańa brend qajet bolsa, ony Sháken atamyzdyń esimimen sabaqtastyryp jasaýǵa da bolatynyn aıtady. Mysal úshin «Sháken Cinema Park» ataýy da jarasyp tur.
— Ár kompanııanyń óz brendi, óz jumys formaty bolady. Ony túsinemiz. Biz eshkimniń bıznesine qyzyqpaımyz da, qyzǵanbaımyz da. Bizdiń aıtpaǵymyz — múlde basqa másele. Jańa kompanııanyń kelýi Sháken Aımanovtyń esimin saqtap qalýǵa kedergi bolmaýy kerek dep oılaımyn. Pavlodardaǵy bul kınoteatr uzaq jyldar halqymyzdyń uly perzenti, qazaq kıno óneriniń jaryq juldyzy Sháken Aımanovtyń esimimen atalyp keldi. Sháken atamyz — jaı ǵana akter nemese rejısser emes. Ol — qazaq teatry men kıno óneriniń damýyna ólsheýsiz úles qosqan, ulttyq ónerimizdiń qalyptasýyna eńbek sińirgen uly tulǵa, — deıdi Maıra atyndaǵy án-óner shyǵarmashylyq mýzeı-úıiniń basshysy, QR mádenıet salasynyń úzdigi Erlan Raqymov.
Al elimizdiń úzdik ólketanýshylarynyń biri, kókiregi shejirege toly Altynbek Qurmanov bala shaǵynda Sháken aǵany kórgenin jetkizdi. Onyń pikirinshe, Sháken Aımanov fılmderi qazaqtyń rýhyn saqtap qalýda mańyzdy ról oınady.
— Keńes ókimeti qazaqtyń barlyq ulttyq bolmysyn joqqa shyǵaryp jatqan zamanda Sháken Kenjetaıulynyń fılmderinen qazaqqa tán boıaýdyń ıisi shyǵyp turatyn. Al endi salǵan ánderi kóptegen fılmde qaıtalanbas daýsymen jazylyp qaldy. Keler urpaq Sháken aǵamyzdyń qandaı adam bolǵanyn, onyń ómiri qalaı órilgenin bilýi úshin onyń esimimen atalatyn mádenı oryndar saqtalyp qalýy kerek, — deıdi ólketanýshy.
Óńirlik mádenıet, tilderdi damytý jáne arhıv isi basqarmasynyń basshysy Medet Taýasqanmen tildeskenimizde ol:
— Jalǵa alýshy kınoteatrdy óz brendimen ataǵan. Bul — kommertsııalyq uıym, oǵan burynǵy ataýdy qaıtar degen talap qoıý qısynǵa kelmeıdi. Onyń ústine jańa ataý-brend áldeqashan ádilet organdarynda tirkelip ketken, — dep sholaq qaıyrdy.
Anyqtaǵanymyzdaı, «Cinema Park» JShS-ne tıesili «G Cinema Park» kınoteatrlar jelisi elimizde ekeý ǵana eken. Onyń biri — Semeı qalasynda bolsa, ekinshisi Pavlodarda endi ǵana ashylyp jatyr. «G Cinema Park» ákimshiligine habarlasqanymyzda, bul másele boıynsha ázirshe túsinik bere almaıtyndaryn, sebebi kınoteatr áli tolyqqandy iske qosylmaǵanyn jetkizdi.
Máseleniń izimen ǵımarat ıesi — «PROMET LTD» kompanııasynyń basshysy Jeńis Qunanbaevqa shyqtyq. Kásipker burynǵy «Sh.Aımanov kınoteatry» degen ataý zańdyq turǵydan eshqaıda tirkelmegenin aıtyp otyr.
— Halyq jaqsy kóretin ataýdy jańa kınoteatr ıeleri ádeıi alyp tastaǵan joq. Konstrýktsııasy ábden eskirgeni sebepti buzýǵa týra keldi. Buıyrsa ol jańa dızaında jasalyp, bıylǵy qyrkúıek aıynyń sońyna deıin «G Cinema Park» ataýynyń janyna «Sháken Aımanov» degen úlken jazý qoıylady. Buǵan qosa kınoteatr ishinde uly kınorejısserge arnalǵan burysh ashylady, — dep ýáde etti.
Eske sala keteıik Pavlodarda Sháken Aımanov Aldar kóse fılminde kıgen bórik saqtalyp tur.
