Pavlodar joldarynda qaraýsyz maldyń kesirinen 23 adam zardap shekken
PAVLODAR. KAZINFORM — Pavlodar oblysynda jyl basynan beri tórt túlikti baqylaýsyz qaldyrǵan 1 300-den astam turǵyn ákimshilik jaýapkershilikke tartylǵan.
Óńirlik polıtsııa departamentiniń habarlaýynsha, maldy qaraýsyz qaldyrý máselesi óńirde jyl ótken saıyn ózekti bolyp bara jatyr. Tórt túlik ıeleriniń salǵyrttyǵy saldarynan qaraýsyz júrgen mal jol-kólik oqıǵalaryna sebep bolyp, barymtashylardyń ońaı oljasyna aınalýda.
— Jyl basynan beri oblys aýmaǵynda malǵa tıisti baqylaý jasamaǵany úshin 1 358 mal ıesi ákimshilik jaýapkershilikke tartyldy. Avtojoldarda tórt túliktiń qatysýymen 11 jol-kólik oqıǵasy tirkelip, atalǵan apattardan 23 adam zardap shekti. Munymen qosa, óńirde mal urlyǵynyń 19 faktisi esepke alyndy, — dep málimdedi polıtsııa departamentinen.
Tártip saqshylary keltirgen málimetke súıensek, qazirgi tańda oblys aýmaǵynda qaraýsyz júrgen maldy ýaqytsha ustaýǵa arnalǵan 128 arnaıy qora-jaı (mal qamaý orny) jumys istep tur. Jyl basynan beri atalǵan oryndarǵa 24 469 bas mal qamalǵan.
Tártip saqshylary óńir turǵyndaryn jeke sharýashylyǵyndaǵy malǵa baqylaýdy kúsheıtip, qaýipsizdik sharalaryn qatań saqtaýǵa shaqyrady.
Eske sala keteıik, Atyraý oblysynda joldaǵy maldan bolatyn apattar eki ese artqan.
