Pavlodar joldarynan alynǵan árbir besinshi synama talapqa saı bolmaı shyqqan
PAVLODAR. KAZINFORM — Pavlodar oblysynda jol-qurylys materıaldarynyń sapasyna júrgizilgen zerthanalyq tekserý kóńil kónshitpeıtin nátıje kórsetti. Jyl basynan alynǵan 1648 synamanyń 357-si, ıaǵnı 21 paıyzy normatıvtik talaptarǵa sáıkes kelmegen.
«Jol aktıvteri sapasynyń ulttyq ortalyǵy» Pavlodar oblystyq fılıaly mamandary jyl basynan óńirdegi avtokólik joldaryna 672 ret ınspektsııalyq tekserý júrgizgen. Onyń nátıjesinde 325 aqaý men zańbuzýshylyq anyqtalǵan. Qazirgi ýaqytta onyń 200-i joıylyp, qalǵan 125-i merdiger uıymdardyń baqylaýynda tur.
Atap aıtqanda, jergilikti mańyzy bar avtokólik joldarynda 60 aqaý tirkelip, onyń 40-y túzetilgen. Eldi mekenderdiń kóshe-jol jelisinde anyqtalǵan 65 kemshiliktiń tek 25-i joıylǵan. Osylaısha, jergilikti joldar men qala, aýyl kóshelerinde áli de 60 aqaý bar.
Alaıda jol sapasyna qatysty másele munymen shektelmeıdi. Zerthanalyq synaqtardyń nátıjesi de birqatar olqylyqty kórsetken.
— Jyl basynan beri joldardan 1648 synama alynyp, zerthanalyq tekserýden ótkizildi. Nátıjesinde 357 synama nemese jalpy kólemniń 21 paıyzy normatıvtik qujattar talaptaryna sáıkes kelmeıtini anyqtaldy. Onyń ishinde 211 sáıkessizdik merdiger uıymdar tarapynan jobalardy iske asyrý barysynda joıyldy, — dep habarlady Kazinform tilshisine «Jol aktıvteri sapasynyń ulttyq ortalyǵy» Pavlodar oblystyq fılıalynyń bas ınjeneri Marat Valıev.
Ásirese jergilikti joldardaǵy kórsetkish alańdatady. Bul sanattaǵy joldardan alynǵan synamalardyń 88-inen normatıvtik talaptarǵa sáıkessizdik anyqtalǵan. Alaıda sonyń tek jeteýi ǵana túzetilgen. ıAǵnı 81 synama boıynsha másele áli sheshimin tappaǵan.
Eldi mekenderdiń kóshe-jol jelisindegi jaǵdaı da máz emes. Munda 253 synamanyń talapqa saı kelmeıtini anyqtalyp, onyń 87-si ǵana normatıvke sáıkestendirilgen. Biraq 166 synama boıynsha sáıkessizdik joıylmaǵan.
Anyqtalǵan kemshilikterge baılanysty oblystyq fılıal memlekettik sáýlet-qurylys baqylaý organdaryna 16 hat joldaǵany aıtylady.
Ulttyq jol aktıvteri sapasy ortalyǵy fılıalynyń málimetinshe, mamandardyń jumysy aqaýlardy tirkeýmen shektelmeıdi. Negizgi maqsat — anyqtalǵan kemshilikterdiń ýaqytyly joıylýyn qamtamasyz etý. Ásirese jergilikti joldar men eldi meken kósheleriniń sapasyna basymdyq berilip otyr.
Eske sala keteıik, Esik kóline aparatyn jol 2027 jyldyń sáýirine deıin jabylady.