Pavlodar jer qatynastary basqarmasynyń basshysy jol apatyna ushyrady
ASTANA. QazAqparat - Pavlodar oblystyq jer qatynastary basqarmasynyń basshysy Rýslan Dáýitbaev jol apatyna jol berdi.
Saldarynan sheneýnikten basqa, tórt adam zardap shekti, dep habarlaıdy pavlodarnews.kz .
Jedel málimetterge súıensek, jol apaty Lenın-Kýrchatov kúre jolynda bolǵan. «Kıa» qyzmettik kóligin tizgindegen vedomstvo basshysy jol qozǵalysynyń qaýipsizdigine kóz jetkizbesten jyldamdyqty asyrǵan. Saldarynan «Toıota» kóligine soǵylady. «Toıota» temir tulparynyń 43 jastaǵy júrgizýshisi men 38, 42 jastaǵy eki jolaýshy túrli jaraqattarmen Aqsý ortalyq aýrýhanasyna jetkizilgen. Bas mı jáne basqa da túrli jaraqat alǵan sheneýniktiń ózi de aýrýhanada jatyr. Sol sátte jolaýshy oryndyǵynda otyrǵan onyń júrgizýshisi alǵashqy medıtsınalyq kómek kórsetilgennen keıin úıine qaıtarylǵan. 51 jastaǵy júrgizýshi jol ústinde jaǵdaıy nasharlaýyna baılanysty basshysynyń rýlge otyrǵanyn aıtady. - Trassa boıymen júrip kele jatyp GRES-ten ótken kezde jaǵdaıym qıyndap ketti, - deıdi Baýyrjan Jumalınov. - Men basshymnan rýlge otyrýyn suradym. Qazirgi tańda densaýlyǵyma baılanysty em qabyldaýdamyn. Oblys ortalyǵynda bul jaǵdaıdyń baqylaýǵa alynǵanyn aıtty. - Búgingi tańda Aqsý QІІB sotqa deıingi biryńǵaı tizilimine QR Qylmystyq kodeksiniń 345-baby, 1-bólimi «Avtomobıl, trolleıbýs, tramvaı nemese basqa da mehanıkalyq kólik quralyn basqarǵan tulǵamen jol erejesin buzý, saldarynan adam densaýlyǵyna aýyr dárejede zııan keltirý» boıynsha jol kólik oqıǵasy faktisi tirkelgen, - dedi Pavlodar oblysy ákiminiń etıka jónindegi ýákili ıÝrıı Feldman. - Budan basqa, is materıaly óńirlik etıka jónindegi keńeske jiberiledi. Sol jerde Dáýitbaevty tártiptik jaýapkershilikke tartý týraly sheshim qabyldanady.
