Pavlodar jáne Shymkent munaı óńdeý zaýyttaryn jańǵyrtý sozylýy múmkin - V. Shkolnık

ASTANA. QazAqparat - QR Energetıka mınıstri Vladımır Shkolnık Pavlodar jáne Shymkent munaı óńdeý zaýyttarynyń jańǵyrtylýyn aıaqtaý merzimi qarjylandyrý baǵytyndaǵy problemalarǵa baılanysty keıinge shegerilýi múmkindigin joqqa shyǵarǵan joq. Bul jaıynda ol búgin Úkimet otyrysynda aıtty.

«Úsh zaýytta jańǵyrtylý júrip jatyr. Bizdegi aqparatqa qaraǵanda, Atyraý munaı óńdeý zaýyty boıynsha búginde problema joq, qurylys-montajdaý jumystary 2016 jyldyń jeltoqsanynda aıaqtalyp, iske qosý jumystary bastalady», - dedi V. Shkolnık QR Premer-Mınıstri Kárim Másimovtiń suraǵyna jaýap berý kezinde.

Onyń aıtýynsha, Pavlodar MÓZ-in jańǵyrtý baǵdarlamasyna shyǵystardy azaıtý boıynsha túzetýler engizildi.

«Ekinshi fazany qosymsha qarjylandyrý boıynsha problema bar (400 mln. teńge), bizdiń bilýimizshe, bul másele sheshilgen joq. Shymkent zaýyty boıynsha máseleni vedomstvoaralyq komıssııada talqyladyq. Bul turǵyda memlekettik kepil máselesi nemese ony kommertsııalyq bankter arqyly qarjylandyrý baǵyty bar. Qytaıǵa sapar barysynda osy máseleni tolyqtaı sheshemiz degen úmittemin. Eger de qarjylandyrý der kezinde sheshilmese, qurylys-montajdaý jumystaryn aıaqtaý 2016-dan 2017 jylǵa birshama jyljýy múmkin»,-dedi V. Shkolnık.