Pavlodar zaýyty tolyq qýatta AI-92 benzınin óndirýge kiristi
ASTANA. QazAqparat - Pavlodar munaı-hımııa óndirý zaýyty tolyq qýatta ıaǵnı táýligine 4,2 myń tonna AI-92 benzınin óndirýge kiristi. Bul týraly QR Energetıka mınıstrligi munaı ónerkásibin damytý departamentiniń dırektory Qýanysh Qudaıbergenov málim etti, dep habarlaıdy «QazAqparat» HAA tilshisi.
«Búgingi tańda Qazaqstanda AI-92 benzıniniń qory 182 myń tonnany quraıdy. Ótken aptadan qaraǵanda 6 myń tonnaǵa ósim bar. Jalpy, AI-92 benzıni boıynsha jaǵdaı turaqtalǵanyn kórip otyrmyz. Bul eń aldymen Pavlodar munaı-hımııa zaýytyndaǵy jóndeý jumystarynyń aıaqtalýymen baılanysty. Belsendi túrde jasalǵan ımport ta óz áserin berip otyr. Ózderińiz biletindeı, qazan aıynda 100 myń tonna AI-92 benzın ımporttalǵan bolatyn. Sondaı-aq ımporttaý bizde toqtamaıdy. Buny negizge ala otyryp, benzın jetkilikti ekenin aıtýǵa bolady», - deıdi ol.
Qýanysh Qudaıbergenovtyń sonymen birge AI-95 benzınine qatysty ahýaldy aıtyp berdi
«Qazan aıynda AI-95 benzınin óndirý tómendegen bolatyn. Qarasha aıynda AI-92 benzınine qatysty jaǵdaı turaqtalyp kele jatqanyn eskere otyryp, AI-95 benzınin zaýyttarda óndirý ósetin bolady. Jospar boıynsha 20 myń tonna AI-95 benzınin shyǵarýdy josparlap otyrmyz. Álbette, barlyǵyn da Pavlodar MHÓZ-ge qatysty suraqtar qyzyqtyryp turǵan bolar. 26 qazanda Pavlodar MHÓZ jóndeý aıaqtaldy. 1 qarashadan bastap benzın óndirile bastady. Keshe katoleıkalyq krekıng iske qosyldy. Bul degenińiz Pavlodar MHÓZ-de táýligine 4 200 tonna benzın óndirile bastaıdy degen sóz. Demek, benzın boıynsha Pavlodar MHÓZ ózi jospary boıynsha tolyq qýatta benzın óndirýge qol jetkizdi», - deıdi Qýanysh Qudaıbergenov.
