«Pavlodar» voleıbol klýby QR kýboginiń ıegeri atandy

Pavlodar qalasyndaǵy «Baıantaý» sport kesheninde voleıboldan erler komandalary arasynda QR kýbogi oıyndary máresine jetti, dep habarlaıdy Kazinform.

Osymen 31-ret uıymdastyrylyp otyrǵan el kýbogi týrnıriniń fınalyna bıylǵy Qazaqstan chempıony «Pavlodar» men «Esil» (Petropavl) klýbtary joldama aldy.

Ulttyq lıga komandalary arasynda bıyl besinshi orynnan kóringen «Esildiń» fınalǵa shyǵýy kútpegen jaǵdaı edi.

Fınaldyq báseke de sondaı tartysty boldy. Onda Petropavl voleıbolshylarynyń jeńiske jetetindeı múmkindikteri boldy. Degenmen sheshýshi sátterde sátti oınaı bilgen Igor Nıkolchenko jattyqtyratyn pavlodarlyqtar 3:2 (22:25, 25:20, 20:25, 25:19, 18:16) esebimen jeńisti julyp aldy.

Osylaısha, «Pavlodar» klýby chempıondyq ataqqa qosa el kýbogine ıe boldy.