«Pavlodar-Vodokanal» kásipkerlerdi jelige qosqany úshin zańsyz tólemaqy alyp kelgen

PAVLODAR. KAZINFORM — Pavlodar oblysynyń prokýratýrasy «Pavlodar-Vodokanal» JShS-yn tekserip, óreskel zańbuzýshylyqtardy anyqtady. 

Monopolıst kásipkerlerdi sýdy aǵyzý, sýmen jabdyqtaý jelilerine qosqany úshin 60 myń teńgege deıin negizsiz tólem alyp otyrǵan.

Kompanııa jańadan qosylatyn áleýetti jáne qyzmetti paıdalanyp otyrǵan kásipkerlerden (abonentterden) qurylys jobasyn kelisýdi de talap etken.

«Pavlodar oblysynyń prokýratýrasy „Pavlodar-Vodokanal“ JShS qyzmetinde tutynýshylardyń retteletin qyzmetke qol jetkizýin shekteıtin tabıǵı monopolııalar salasyndaǵy zańnamany óreskel buzýshylyqtardy anyqtady. Olardan sýdy aǵyzyp, sýmen jabdyqtaý jelilerine qosqany úshin 60 myń teńgege deıin negizsiz tólem alynǵan. Monopolıste 137 myń abonent tirkelgen, onyń ishinde jeke tulǵalar — 133 myń, bıýdjettik uıymdar jáne basqa da sharýashylyq júrgizýshi sýbektiler — shamamen 4 myń. Qadaǵalaý aktisi boıynsha JShS-nyń zańsyz qyzmetiniń joly kesilip, kásipkerler úshin ákimshilik kedergi joıyldy, sýmen jabdyqtaý jelilerine qosylý tártibi qoldanystaǵy zańnamaǵa sáıkestendirildi» dep habarlady prokýratýradan.

Monopolıst Ákimshilik quzyq buzý týraly kodekstiń 164-baby 4-bóligi (tabıǵı monopolııalar týraly zańnamada belgilengen mindetterdi tıisinshe oryndamaý) boıynsha jaýapkershilikke tartylyp, 6 mln teńge aıyppul arqalady.