Pavlodar - Ýspen tas jolyndaǵy «apat»: 22 adam zardap shekti
PAVLODAR. QazAqparat - Pavlodar oblysynda «Qys-2018» respýblıkalyq komandalyq shtabtyq oqý-jattyǵýlary ótkizildi, dep habarlaıdy pavlodarnews.kz oblystyq tótenshe jaǵdaılar departamentiniń baspasóz qyzmetine silteme jasap.
Oqý-jattyǵýlardyń negizgi taqyryby - qys mezgilindegi tótenshe jaǵdaılardyń aldyn alý jáne olardy joıý kezinde jedel áreket etý. Josparǵa sáıkes Pavlodar - Ýspen tas jolyndaǵy Moıyldy aýyly mańynda kóktaıǵaq saldarynan bolǵan apatta jeńil avtokólik pen avtobýs soqtyǵysyp qalady. Saldarynan 20 adam men kólikterdiń eki júrgizýshisi zardap shekken.Olar ártúrli dene jaraqatyn alǵan. Al avtobýs jol jıegine shyǵyp ketken. Buǵan qosa, Moıyldy aýylyna jaıaý jetpek bolǵan tórt jolaýshy adasyp ketedi.
«Oqıǵa ornyna zardap shekkenderdi kóshirý, apattyq-qutqarý jumystaryn júrgizý jáne adamdardy izdeý úshin qalanyń shuǵyl qyzmetteri kelip jetti. Qutqarýshylar zardap shekkenderdi jaqyn mańdaǵy jylytý pýnktine jetkizip, olarǵa medıtsınalyq kómek kórsetti. Sonymen qatar jylytý pýnktiniń qyzmetkerleri ystyq shaı usyndy»,- deıdi departamentte.
Oqý-jattyǵýlarǵa TJD jedel-qutqarý jasaǵy, órt sóndirý jáne apattyq-qutqarý jumystary qyzmeti, apattar medıtsına ortalyǵy, polıtsııa departamenti, «103», azamattyq qorǵaý qyzmeti, jergilikti atqarýshy organdardyń kúshteri men quraldary tartyldy. Tájirıbelik arnaıy-taktıkalyq oqý-jattyǵýǵa 14 tehnıka men 47 adam jumyldyryldy. Sondaı-aq Reseıdiń shekaralas Omby jáne Novosibir oblystary, Altaı ólkesimen skaıp arqyly aqparatty jedel kezekshiler arqyly jetkizý uıymdastyryldy.
Foto: oblystyq TJD
