Pavlodar turǵynynan 1,4 keli sıntetıkalyq esirtki tabyldy
Pavlodar oblysynyń esirtki qylmysyna qarsy is-qımyl jónindegi qyzmetkerleri jedel-izdestirý is-sharalaryn júrgizý barysynda Pavlodar qalasyndaǵy garaj kooperatıvteriniń biriniń janynan Daewoo Nexia kóligin toqtatty.
«Tekserý kezinde júrgizýshi oryndyǵynyń astynan untaq zat salynǵan polıetılen oramdary tabylyp, tárkilendi. Jeke tintý barysynda júrgizýshiniń ózinen untaq zaty bar polıetılen oramdary, turǵylyqty jerinen ishinde kók tústi, untaq tárizdi zattary bar metall jáne plastmassa tostaǵandary, sondaı-aq elektrondy tarazylar anyqtaldy», – dep habarlady Pavlodar oblysy Polıtsııa departamenti esirtki qylmysyna qarsy is-qımyl basqarmasynyń aǵa jedel ýákili Sanııa Ahmetjanova.
Sot-hımııa saraptamasynyń qorytyndysyna sáıkes tárkilengen zattar salmaǵy 920 gramm A-RVR psıhotroptyq zaty (jyldamdyq) jáne salmaǵy 556 gramm psıhotroptyq zat 4-metılmetkatınon (mefedron) ekeni anyqtaldy.
Alynǵan sıntetıkalyq preparattyń jalpy salmaǵy – 1 keli 487 gramm.
Osy fakti boıynsha QR Qylmystyq kodeksiniń 297-baby 3-bóligi boıynsha sotqa deıingi tergeý júrgizilip jatyr. Kúdikti Pavlodar qalasy polıtsııa basqarmasynyń ýaqytsha ustaý ızolıatoryna qamaldy.
Foto: polisia.kz
