Pavlodar turǵyny polıtseıge para bergeni úshin sottaldy
PAVLODAR. QazAqparat – Jolda júrý erejesin buzǵany úshin polıtsııa qyzmetkerleri toqtatqan pavlodarlyq júrgizýshi para berip qutylmaqshy boldy, dep habarlaıdy QazAqparat tilshisi.
«Sáýir aıynda Pavlodar qalasynyń patrýldi polıtsııasynyń batalon qyzmetiniń ınspektorynan pavlodarlyqtyń ákimshilik jaýapkershilikke tartylmaý úshin eki myń teńge kóleminde syıaqy berýge tyrysqany týraly telefon habarlamasy kelip tústi. Júrgizýshi qıylystan ótý nemese joldyń júretin bóligin ótý erejesin buzǵan», - dedi Pavlodar oblysy polıtsııa departamentiniń ózindik qaýipsizdik basqarmasynyń basshysy Tólegen Alpysbaev.
Onyń aıtýynsha, Qazaqstan Respýblıkasy QK 367-baby boıynsha sotaldy tergeý júrgizildi. Júrgizýshi aıypty dep tanyldy, paranyń 11,25 ese kóleminde 22 500 teńge aıyppul salyndy.
«Jyldyń basynan bastap Pavlodar oblysynyń ózindik qaýipsizdik basqarmasynyń qyzmetkerleri tórt polıtseıge zańsyz aqsha berý faktisin anyqtady», - dedi Tólegen Alpysbaev.
