Pavlodar turǵyny kezdeısoq Qımaq dáýirine tán qabir taýyp aldy
ASTANA. QazAqparat - Pavlodar oblysy Ertis aýdany Ertis aýylynyń turǵyny jer qazyp jatyp alyp janýardyń súıegin taýyp aldy. Kýágerler ony bastapqyda dınozavrdyń súıegi eken dep qalǵan, dep jazady pavon.kz saıty.
Eski molany taýyp alǵan Oleg Karamannyń otbasy 15 jyldan beri Ertis aýylynda turyp keledi. Olar úı salý úshin jer qazyp jatyp kezdeısoq 2 metr tereńdikten alyp janýardyń súıegin tapqan.
Shuńqyrdan tabylǵan janýardyń sýretin turǵyndar BAQ ókili arqyly Potanın atyndaǵy ólketaný mýzeıiniń arheology Georgı Peresvetovke joldaǵan. Janýar súıegimen jiti tanysqan Georgı Peresvetov tabylǵan súıektiń jylqyǵa tıesili ekendigin naqtylady. Arheolog ol jerde ejelgi Qımaq memleketi kezindegi qabir bolýy múmkin dep joramaldap otyr.
«Orta ǵasyrdaǵy Qımaq memleketinde ólgen adamdy atpen birge jerleý ǵurpy bolǵan. Máıitpen birge jylqynyń tek basyn, keı kezderi jylqyny bútindeı, sondaı-aq terisimen birge jerleıtindigin arhıologııalyq zertteýler naqtylaı túsedi», - deıdi Georgı Peresvetov.
Óz kezeginde arheolog turǵyndar kezdeısoq taýyp alǵan shuńqyrdyń molaǵa óte uqsaıtyndyǵyn jáne ol jerde basqa da súıekterdiń, onyń ishinde adamnyń da súıeginiń bolýy ábden múmkin ekendigin aıtady.
