Pavlodar turǵynynan jalpy quny 22 mln teńgeden asatyn esirtki tárkilendi

PAVLODAR. KAZINFORM - Polıtseıler jedel-izdestirý sharalaryn júrgizip, buryn sottalǵan 29 jastaǵy turǵyndy ustady. Kúdiktiniń jeke zattaryn tekserý barysynda tyıym salynǵan zattardyń ornalasqan jeri týraly derekter bar uıaly telefon jáne 16 orama esirtki, eki polıetıen paket tárkilendi.

Saraptama qorytyndysy boıynsha oramalarda jalpy quny 22 mln teńgeden asatyn sıntetıkalyq esirtkiler, al polıetılen paketterde salmaǵy 1,5 kılogramnan asatyn sıntetıkalyq kannabınoıdtar bolǵany anyqtaldy. Bul shamamen 4000 dozany quraıdy.

- Kúdikti óz kinásin moıyndap, esirtki taratatyn ınternet-dúkende «qaptamashy» bolyp jumys istegenin jáne jeńil tabysqa qyzyqqanyn jetkizdi. Onyń aıtýynsha, kýratorlardan túsken tapsyrmalardy oryndap, esirtki zattaryn arnaıy qoımalardan alyp, olardy jasyryn oryndarǵa tyǵý ádisimen taratqan,-dep habarlady Pavlodar oblysy polıtsııa departamentiniń baspasóz qyzmetinen.

Atalǵan derek boıynsha esirtki nemese psıhotroptyq zattardy zańsyz satyp alý, saqtaý, tasymaldaý jáne ótkizý babymen qylmystyq is qozǵaldy. Qazirgi ýaqytta kúdikti qamaýda. Sonymen birge aımaq aýmaǵynda esirtki jetkizý jáne taratýǵa qatysy bar ózge de tulǵalardy anyqtaý jumystary jalǵasyp jatyr.

Eske sala keteıik, elimizde esirtki qylmysyna qatysty jaza ózgerdi.