Pavlodar turǵyny zańsyz kásipkerlikpen aınalysyp, metall qabyldap kelgen
PAVLODAR. KAZINFORM - Oblys aýmaǵynda «Metall» jedel-profılaktıkalyq is-sharasy ótkizildi. Polıtseıler metall qabyldaıtyn 150-ge jýyq pýnktti tekserip, nátıjesinde 20 zańbuzýshylyqty anyqtaldy.
Pavlodar oblysynyń aýmaǵynda urlanǵan metaldy ótkizý oryndaryn pysyqtaýǵa, metall urlyǵyn, asyl tastardyń, tústi jáne qara metaldardyń, olardyń synyqtary men qaldyqtarynyń zańsyz aınalymyn uıymdastyratyn adamdardy anyqtap, ustaýǵa baǵyttalǵan «Metall» jedel-profılaktıkalyq is-sharasy ótkizildi.
«Tekserý barysynda pýnkt ıelerimen profılaktıkalyq áńgimeler júrgizildi. Olar urlanǵan metaldy tapsyrýmen aınalysatyn adamdardy anyqtaǵan jaǵdaıda dereý 102 nómirine qońyraý shalýy qajet ekeni, sondaı-aq qylmystyq jolmen kórineý óndirilgen múlikti satyp alý nemese ótkizý úshin qylmystyq jaýapkershilik týraly eskertildi», - deıdi Pavlodar oblysy Polıtsııa departamenti krımınaldyq polıtsııa basqarmasynyń bastyǵy Balǵabaı Qaparov.
Іs-shara barysynda abattandyrý erejelerin buzǵany úshin birneshe pýnkt ıesi jazalandy. Al Tereńkól aýdanynda salyq organdarynda eshbir tirkeýsiz kásipkerlik qyzmetpen aınalysqan turǵyn anyqtaldy. Azamatty jaýapkershilikke tartý úshin jergilikti Memlekettik kirister bólimine tıisti materıal toltyrylyp jiberildi. Sondaı-aq, oblys aýmaǵynda qosalqy bólshekterdi, metall qubyry men kabeldi urlady degen kúdikke ilingen úsh turǵyn anyqtaldy. Qazir árbir fakti boıynsha tekserý júrgizilip jatyr.
Eske sala keteıik, Álemdegi eń qymbat metall — osmıı Qazaqstanda ǵana óndiriledi, biraq ol jaıly búkil málimet qupııa.
