Pavlodar turǵyny zańsyz berilgen jerdi ákimdikten sot arqyly qaıtaryp aldy
PAVLODAR. KAZINFORM — Áıel adam jalpy paıdalanýdaǵy jerdiń jeke tulǵaǵa berilýin zańsyz dep tanýdy talap etip, sotqa júgingen.
QR Kassatsııalyq sotynyń habarlaýynsha, Pavlodar qalasynyń turǵyny qalalyq ákimdikke qarsy talap aryz túsirgen. Áıeldiń aıtýynsha, onyń úıiniń janyndaǵy jer telimi jeke menshikke berilip ketken. Kóp uzamaı ol bul aýmaqtyń jalpy paıdalanýdaǵy jerlerge jatatynyn anyqtaǵan. Onyń ústine, ol jerde ınjenerlik kommýnıkatsııalar ornalasqan ári avtoturaq jabdyqtalǵan.
Alǵashqy jáne ekinshi ınstantsııadaǵy sottar pavlodarlyq áıeldiń talap aryzyn qanaǵattandyrýdan bas tartqan. Alaıda ol munymen toqtalmaı, kassatsııalyq shaǵym túsiredi.
— Sot ákimdik qaýlysy qabyldanǵan sátte jer teliminiń jalpy paıdalanýdaǵy jerlerge jatqanyn, onyń mártebesin ózgertý protsedýrasy júrgizilmegenin, al jerdi berýdi kelisý kezinde jer zańnamasynyń talaptary saqtalmaǵanyn anyqtady. Budan bólek, tómengi satydaǵy sottar ınjenerlik kommýnıkatsııalardyń bolýyna jáne istiń basqa da mańyzdy mán-jaılaryna tıisti baǵa bermegen, — dep habarlady ákimshilik ister jónindegi Kassatsııalyq sottan.
Nátıjesinde tómengi satydaǵy sottardyń sot aktileriniń kúshi joıylyp, pavlodarlyq áıeldiń talap aryzy qanaǵattandyryldy. Al ákimdiktiń qaýlysy zańsyz dep tanyldy.
Eske sala keteıik, Jetisýda 200 gektar qunarly jer memleket menshigine qaıtaryldy.
