Pavlodar turǵyny saqtandyrý kompanııasynan 13 mln teńgeden astam ótemaqy óndirip aldy

PAVLODAR. KAZINFORM - 2023 jyly Pavlodar qalasynyń turǵyny TI baǵdarlamasy boıynsha saqtandyrý kompanııasymen kólik quralyn erikti saqtandyrý shartyn jasaǵan. Oǵan «Toıota» markaly avtokóliktiń saqtandyrý polısi rásimdelgen.

Alaıda bir aıdan keıin er adam jol-kólik oqıǵasyna túsip, saqtandyrý jaǵdaıy týraly saqtandyrý kompanııasyna aryz joldaǵan. Saqtandyrý kompanııasy jeke kásipkerdiń qorytyndysyna súıene otyryp, saqtandyrý jaǵdaıy jalǵan ekenin kórsetip, oǵan saqtandyrý tólemin tóleýden bas tartqan.

Er adam sotqa júginip, saqtandyrý kompanııasynyń bas tartýyn zańsyz dep tanýdy jáne 13 mln teńgeden astam saqtandyrý tólemderin óndirýdi suraǵan. Birinshi satydaǵy sot taraptardyń jol-kólik oqıǵasynyń mán-jaıyna qatysty qarama-qaıshy ustanymdaryn eskere otyryp, sot-izdestirý saraptamasyn taǵaıyndaǵan. Onyń qorytyndysynan avtokólikke keltirilgen zalal atalǵan jol-kólik apatynyń saldarynan bolýy múmkin ekendigi anyqtalǵan.

Osyǵan baılanysty talap qoıý tolyq kólemde qanaǵattandyrylǵan. Al saqtandyrý kompanııasy bul sheshimge apellıatsııalyq sotqa shaǵym túsirgen.

- Pavlodar oblystyq soty isti zertteı kele, sot saraptamanyń qorytyndysy is materıaldaryna, ákimshilik iske jáne kýálerdiń aıǵaqtaryna sáıkes keletinin anyqtady. Talap qoıýshynyń avtokóligi polıtsııa qyzmetkerleriniń qatysýymen jol-kólik oqıǵasy ornynan ýaqytsha ustaý ızolıatoryna jetkizilgen, bul rastaldy. Saqtandyrý kompanııasy saqtandyrý talabyn burmalaý týraly óz dálelderin rastaıtyn dáleldemelerdi usynǵan joq. Apellıatsııa birinshi satydaǵy sottyń sheshimin ózgerissiz qaldyrdy, - dep habarlady óńirlik sottyń baspasóz qyzmetinen.

Qaýly zańdy kúshine endi.

Eske sala keteıik, Ekibastuzda Tótenshe jaǵdaılar basqarmasynyń bastyǵy sottaldy.