Pavlodar turǵyny qurǵan qarjy pıramıdasyna 100 mln teńgeden astam qarjy salynǵan
PAVLODAR. KAZINFORM - Qarjylyq monıtorıng agenttiginiń Pavlodar oblysy boıynsha departamenti «Avtolıýks» ınvestıtsııalyq pıramıdasyn qurý jáne ony basqarý deregi boıynsha sotqa deıingi tergep-tekserýdi tirkedi.
Qarjylyq pıramıdanyń áreket etken kezeńi bar-joǵy 3 aı - 2024 jyldyń qyrkúıeginen qarashasyna deıingi aralyqty qurady. Osyǵan qaramastan onyń qyzmeti Pavlodar, Almaty, Aqtóbe jáne ózge oblystarǵa taralǵan.
- Kúdikti ınternet-dúken platformasynda jumys isteı otyryp, ár 10 kún saıyn 5%-dan 15%-ǵa deıin syıaqy tóleýmen taýarlardy jalǵan túrde bólip tóleý arqyly aqsha salý jóninde usynys jasaǵany anyqtaldy. Salymshylar qolyna tımegen taýar nesıesin tóleı bergen, al kúdikti bolsa, taýarlyq nesıeni qolma-qol aqshaǵa aınaldyryp, ony qymbat oıyn-saýyqqa, sonyń ishinde shetelge jasaǵan (BAÁ, Taıland jáne t.b.) saparlaryna jumsaǵan. Kúdikti pıramıdaǵa 150-den astam adamdy tartyp, olar jalpy somasy 100 mıllıon teńgeden astam qarajat salǵan, - dep habarlady Qarjylyq monıtorıng agenttiginiń Pavlodar oblysy boıynsha departamentinen.
Zańsyz jolmen tapqan aqshaǵa kúdikti Mercedes Benz jáne Toyota Camry markaly eki avtokólik satyp alǵany anyqtaldy. Olarǵa sottyń sanktsııasymen tyıym salyndy. Sot kúdiktige qatysty «úıqamaq» túrinde bultartpaý sharasyn tańdaǵan. QR Qylmystyq protsessýaldyq kodeksi 201-babyna sáıkes, ózge aqparat tergeý múddesinde jarııalaýǵa jatpaıdy.
Ótken jyly Agenttik salymshylarǵa 20 mıllıard teńgeden astam zalal keltirgen 42 qarjylyq pıramıdany joıǵan.
Nátıjesinde 78 adam sottalyp, 13 mıllıard teńgeden astam zalal ótelgen.