Pavlodar turǵyny avtosalondy sotqa berip, 20,5 mln teńge óndirip aldy

PAVLODAR. KAZINFORM - Tutynýshynyń aıtýynsha, ol jergilikti avtosalonnan quny 19 190 000 teńge turatyn jeńil kólik satyp alǵan. Oǵan qosa kólik quralyn saqtandyrýǵa 1,7 mln teńge rásimdegen.

Belgili bolǵandaı, jańa kólik dılerdiń alǵashqy tehnıkalyq qyzmet kórsetýinen soń buzyla bastaǵan. Tutynýshynyń aıtýynsha, qozǵaltqyshqa quıylǵan maı kelesi kúni súzgi arqyly syrtqa aǵyp ketken. Odan soń kólik bir aı servıstik ortalyqta turǵan.

- Osy kezeńde avtokóliktegi qozǵaltqysh ashylǵan. Bul rette ortalyq mamandary qozǵaltqyshty ashý jáne bólshekterin aýystyrý júrgizilgeni týraly jazbasha qujattar usynbaǵan. Bizdiń departamenttiń mamandary azamatqa sotqa deıingi talap qoıýǵa kómektesti. Ári qaraı tutynýshy sotqa avtokólikti satyp alý-satý shartyn buzý jáne aqshany qaıtarý týraly talap aryzben júgindi. Sondaı-aq, departament sot úderisine derbes talap qoımaıtyn úshinshi tulǵa retinde qatysty,-dep habarlady Pavlodar oblysy boıynsha Saýda jáne tutynýshylardyń quqyqtaryn qorǵaý departamentinen.

Nátıjesinde sot tutynýshynyń paıdasyna kólik úshin tólengen 19 190 000 teńgeni, 959 500 teńge mólsherinde turaqsyzdyq aıybyn, 62 810 teńge shyǵyndy, 100 000 teńge mólsherinde moraldyq zııan somasyn, 203 969 teńge somasynda sot shyǵyndaryn, jalpy somasy 20 516 279 teńgeni óteý týraly sheshim shyǵarǵan.

Eske sala keteıik, Oralda kóligine zaqym kelgen turǵyn 9,2 mıllıonnan astam teńge óndirip aldy.