Pavlodar turǵyny avtodılerden 13 mln teńgeden astam qarajat óndirip aldy
PAVLODAR. KAZINFORM - Pavlodarlyq áıeldiń avtosalonnan satyp alǵan jańa kóliginiń qozǵaltqyshy jarty jyldan soń isten shyqqan. Ony jóndeý múmkin bolmaǵandyqtan, sapasyz kólik quralyn sot arqyly qaıtarýǵa týra kelgen.
Pavlodar oblysynyń saýda jáne tutynýshylardyń quqyqtaryn qorǵaý departamentiniń málimetinshe, quny 12 mıllıon teńgeden asatyn jańa kólikke qatysty daý-damaı 2025 jyly bastalǵan. Áıel sheteldik kólikti dılerden satyp alǵan. Qozǵaltqyshta aqaýlar paıda bolǵannan keıin tutynýshy salonǵa júgingen.
Ondaǵylar kepildik mindettemeler aıasynda bárin retke keltirýge tyrysqan. Alaıda jóndeýden keıin jaǵdaı aıtarlyqtaı ózgere qoımaǵan. Aqyrynda áıel avtodılerge resmı shaǵym jazýǵa májbúr bolady.
- Kásipkerlik sýbektisi sotqa deıingi shaǵymǵa ýaqytyly jaýap bergen joq. Biz tekseris júrgizip, kásipkerlik sýbektisin ákimshilik jaýapkershilikke tarttyq, aıyppul saldyq. Budan keıin tutynýshy sotqa júgindi. Sotta departament úshinshi tulǵa retinde qatysty. Sot talqylaýy aıasynda tehnıkalyq saraptama júrgizildi, - deıdi óńirlik saýda jáne tutynýshylardyń quqyqtaryn qorǵaý departamenti basshysynyń orynbasary Nursulý Áýbákirova.
Tehnıkalyq saraptama aqaýdyń kúrdeli ekenin rastaǵan. Ári bul qorytyndy sot sheshiminiń negizine aınalǵan.
Materıaldardy zertteı kele, sot avtosalondy pavlodarlyq áıelge taýardyń tolyq qunyn tóleýge, moraldyq shyǵyn men zańger qyzmetin óteýge mindettedi. Tólemderdiń jalpy somasy 13 mıllıon teńgeden asady. Dıler avtokólikti qaıtaryp alýdy da ózi resimdeýi kerek.
Eske sala keteıik, Pavlodar oblysynda tutynýshylardyń 32 mln teńgeden asa qarajaty qaıtaryldy.
