Pavlodar turǵyndary jylý jetispeýshiligine shaǵymdanyp jatyr

PAVLODAR. KAZINFORM — Oblys ortalyǵyndaǵy birqatar kópqabatty úıler jylýǵa jarymaı tur. Ásirese, Ekinshi Pavlodar, Ýsolka shaǵyn aýdanynyń turǵyndary kún salqynda jaýrap otyrǵandaryn aıtady.

Pavlodar qalasyndaǵy barlyq kópqabatty úı ortalyq jylý kózine qosylǵanymen, keıbir úılerdiń turǵyndary jylý batareıalary tolyq qyzbaı turǵanyna shaǵymdanyp otyr. 
Óńirde kún qazir salqyn, túngi ýaqytta temperatýra 0 gradýsqa deıin tómendeıdi. Soǵan oraı páterlerde turatyn halyq jaýraı bastaǵandaryn aıtady.

Jylý jetispeýshiligi Ýsolka, Ekinshi Pavlodar shaǵyn aýdandary men qalanyń ortalyq bóliginde jıi kezdesýde. Kóptegen úılerdiń bir podezinde jylý bolsa, ekinshisinde jylý tolyq qosylmaǵan. Al endi bir shaǵyn aýdandarda qysymnyń jetpeıtini baıqalady. Sebebi páterlerdegi batareıalar qyzyp turady da kenetten birden salqyndap ketedi. Kópshilik qalanyń ortalyq jylý jelilerinde másele bar dep esepteıdi.

Qalalyq ákimdiktiń dereginshe barlyq 1308 kópqabatty úıge jylý 30 qyrkúıekte tolyq qosylyp bolǵan.

— Shahardaǵy áleýmettik mekemeler 10 qyrkúıekten jylý kózine qosylsa, 22–30 qyrkúıek aralyǵynda barlyq turǵyn úıler ortalyqtandyrylǵan jylý kózine jalǵandy. ıAǵnı jylý kirmeı turǵan úı joq. Másele qaladaǵy gıdravlıkalyq rejımdi qalpyna keltirýge baılanysty bolyp tur. Bul jumyspen qalalyq jylý jelileri mekemesi shuǵyldanyp jatyr. Qalada jylý boıynsha arnaıy komıssııa qurylǵan, ár úıdiń, ár jeke turǵynnyń ótinishi boıynsha tıisti is-sharany atqaryp jatyr. Sonymen qatar PIK-ter de ár úıdegi qysymdy retke keltirýmen shuǵyldanýda. Bir apta ishinde gıdravlıkalyq retteý jumystary aıaqtalýy kerek. Sol kezde úılerdegi jylý qalypty temperatýraǵa jetedi, — dep túsindirdi jaǵdaıdy qalalyq ákimdiktiń baspasóz qyzmeti.

Ákimdik ókilderi atap ótkendeı, jylý jelilerindegi gıdravlıkalyq rejımdi retteý óte kúrdeli protsess. Keıbir úıler jylý jelisiniń eń sońynda ornalasýy múmkin. Ondaı jaǵdaıda retteý jumystarymen tutastaı brıgada shuǵyldanady.

Buǵan deıin Pavlodar qalasynda turǵyn úılerge jylý berile bastaǵanyn habarlaǵanbyz.