Pavlodar turǵyndary múlik salyǵy boıynsha 42 mln teńgege jýyq qaryz
PAVLODAR. KAZINFORM — Pavlodar oblystyq memlekettik kirister departamentiniń málimetinshe, 260 myńnan astam salyq tóleýshige 2025 jylǵa jalpy somasy 346,6 mln teńge múlik salyǵy eseptelgen.
Qazirgi ýaqytta bıýdjetke 124,6 mln teńge túsken. Sonymen qatar óńirdiń 28 myńnan astam turǵyny ótken kezeńderdegi salyǵyn tólemeı otyr.
— Azamattarda atalǵan salyq túri boıynsha 42 mln teńgege jýyq bereshek jınalyp qalǵan. Múlik salyǵy jyljymaıtyn múlik nysanynyń ornalasqan jeri boıynsha tólenedi, — dep habarlady departamentten.
Mamandar 2025 jylǵy jeke tulǵalardyń múlik salyǵyn tóleý merzimi 1 qazanda aıaqtalatynyn eskertedi.
2 qazannan bastap salyqty ýaqytyly tólemegen azamattardyń bank shottaryn ashý, aqsha aýdarý jáne kredıt alý múmkindigi shekteledi. Sonymen birge merzimi ótken árbir kún úshin QR Ulttyq bankiniń qaıta qarjylandyrý resmı stavkasynyń 1,25 eselengen mólsherinde ósimpul esepteledi.
Eske sala keteıik, buǵan deıin 290 mln teńge salyqtan jaltarǵan kúdikti Reseıden Qazaqstanǵa qaıtarylǵanyn jazǵanbyz.
