Pavlodar turǵyndary alaıaqtarǵa 3 mlrd teńgesin sanap bergen

PAVLODAR. KAZINFORM - Jyl basynan óńirde ınternet alaıaqtyqqa qatysty 1205 jaǵdaı tirkeldi. Áıel adamdar erlerge qaraǵanda eki ese kóp aldanǵan.

Pavlodarlyq polıtseıler jurtshylyqty qarajattaryna saq bolýǵa shaqyryp otyr. Oblys boıynsha ınternet alaıaqtyq órship tur. Jyl basynan 1205 jaǵdaı tirkelip, sengish azamattar jalpy somasy 3 mlrd teńgesinen aırylǵan. Jaǵdaı bulaı jalǵasa bermeý úshin jurtyshylyqtyń qarjylyq saýattylyǵyn arttyrýǵa kúsh salynyp jatyr.

- Qaskúnemderdiń tuzaǵyna kóbine áıelder túsip qalatyny baıqalady. Jyl basynan 800-ge jýyq áıel adam alaıaqtyqtan zardap shekken. Oblys turǵyndary kóp jaǵdaıda oıdan shyǵarylǵan «kómekshilerge» senim artyp, qorqytý men emotsıonaldyq qysymnyń, jyldam paıda ákeletin qarjylyq shemalardyń qurbany bolyp jatady, - deıdi Pavlodar oblysy polıtsııa departamenti kıberqylmysqa qarsy is-qımyl basqarmasynyń bastyǵy Ashat Ábetjanov.

Tártip saqshylary alaıaqtardyń arbaýyna túsip qalmaý úshin qarapaıym aqyl-keńesterge qulaq túrý kerek ekenin aıtady.

«Bankten, memlekettik organnan nemese ınvestıtsııalyq kompanııadanbyz dep telefon shalǵandarǵa senbeńizder. Karta nómirin, jasyryn sózder men kodtardy aıtýǵa, uıaly telefonǵa belgisiz qosymshalardy ornatýǵa bolmaıdy. Tekserilmegen satýshylardan taýar almaýǵa, kúdikti siltemelerge ótpeýdi suraımyz. Munyń barlyǵy ańqaý adamdar úshin qurylǵan tuzaq» ,-deıdi polıtseıler.

Eske sala keteıik, elýden asqan adamdar ınternet alaıaqtaryna jıi aldanady.