Pavlodar tramvaı parki nelikten oblystyń kommýnaldyq menshigine ótti
PAVLODAR. KAZINFORM - «D.D.Mahmýdov atyndaǵy Pavlodar qalasynyń tramvaı basqarmasy» AQ aktsııalar paketi «Pavlodar» áleýmettik-kásipkerlik korporatsııasynan Pavlodar oblysy ákimdiginiń kommýnaldyq menshigine berildi.
Bul týraly «Pavlodar» ÁKK basqarma tóraǵasy Dáýren Jambaıbek málimdedi. Onyń aıtýynsha, sheshim tramvaı parkin keshendi jańǵyrtý, baqylaýdy kúsheıtý jáne kásiporynnyń basqarý tıimdiligin arttyrý maqsatynda qabyldanǵan.
- Tramvaı basqarmasy 2011 jyldan beri «Pavlodar» ÁKK AQ qurylymynda jumys istep keldi. Osy ýaqyt aralyǵynda jyljymaly quramdy jańartý jáne tramvaı joldaryn kúrdeli jóndeý boıynsha birqatar jumys júrgizildi. Degenmen ınfraqurylym men vagondardyń tozý deńgeıi joǵary kúıinde qalyp otyr. Sondyqtan óńir bıligi basqarý modelin qaıta qarap, kásiporyndy memlekettik basqarýǵa kezeń-kezeńimen kóshirý týraly sheshim qabyldady. Qoldanystaǵy zańnamaǵa sáıkes aktsııalar paketin birden qalanyń kommýnaldyq menshigine berý múmkin bolmaǵandyqtan, alǵashqy kezeńde ol oblys menshigine ótti. Aldaǵy ýaqytta tramvaı basqarmasyn Pavlodar qalasynyń kommýnaldyq menshigine berý josparlanyp otyr, - deıdi ol.
Mamandardyń pikirinshe, bul qadam basqarýshylyq sheshimderdi jedel qabyldaýǵa, salalyq memlekettik organdarmen ózara is-qımyldy kúsheıtýge jáne bıýdjet qarajatynyń ashyqtyǵyn arttyrýǵa múmkindik beredi.
Sondaı-aq kommýnaldyq menshik formaty tikeleı bıýdjettik qarjylandyrýdy qamtamasyz etip, memlekettik ınvestıtsııalar tartýǵa jáne tramvaı parkin kezeń-kezeńimen jańartýǵa jaǵdaı jasaıdy. Bul óz kezeginde jolaýshylar tasymalynyń qaýipsizdigin arttyryp, qyzmet kórsetý sapasyn jaqsartýǵa yqpal etpekshi.
Óńir bıliginiń málimetinshe, qabyldanǵan sheshim Pavlodar qalasynyń qoǵamdyq kólik júıesin uzaq merzimdi damytýǵa baǵyttalǵan.
Buǵan deıin Belarýs tramvaılary Pavlodarǵa ne sebepti jetkizilmegenin jazǵanbyz.
