Pavlodar topyraǵy bar kapsýla Moldovadaǵy Qanash Qamzınniń bıýsti janyna kómiledi

PAVLODAR. QazAqparat - Sankt-Peterbýrgte Moldova ókilderine Pavlodardyń bir ýys topyraǵy salynǵan «altyn» kapsýla tabystaldy. Ony Moldovada Keńes Odaǵynyń batyry Qanash Qamzınge ornatylǵan bıýstiń janyna kómý josparlanǵan, dep habarlaıdy QazAqparat tilshisi.

«2019 jyly eki mereıtoılyq data bar. Bıyl Qanash Qamzınniń týǵanyna 100 jyl jáne ómirden ótkenine 75 jyl tolady», - dedi «Maıdan joly» Pavlodar zertteý jasaǵynyń komandıri Aleksandr Shıtov.

Aleksandr Moldovada Qanash Qamzınniń músininiń janyna Pavlodardyń bir ýys topyraǵy salynǵan kapsýlany kómý úshin «Eske alý kapsýlasy» patrıottyq aktsııasyn bastady.

«Aktsııany júzege asyrý aıasynda Moldovanyń qoǵamdyq izdeý qozǵalysynyń kóshbasshylarymen, «Birlikpen kelgen Uly Jeńis» forýmynyń uıymdastyrýshylarymen, batyrdyń týysy Qamzına Bıǵaısha Shákiqyzymen, «Generaldar keńesi» ókili (Almaty), general-maıor Qaıdarov Rústem Esimhanulymen, ERG Eýrazııa toby ókilimen aldyn ala kelisim júrgizdik», - dep bólisti A.Shıtov.

Osy kelissózderden keıin forýmda Aleksandr Shıtov Qazaqstan ókili retinde Moldova Respýblıkasynyń ókilderine «altyn kapsýlany» tapsyratyny sheshilgen.

«Altyn» kapsýla Moldovaǵa attandyrylady, al jasyl tústi kapsýla Kıngıseppe qalasyndaǵy (Reseı) qazaqstandyq jaýyngerlerge arnalǵan jańa granıtti eskertkishtiń túbine kómiledi», - dep qosty ol.