Pavlodar tas joldarynda jyl basynan 25 adam kóz jumǵan

PAVLODAR. KAZINFORM - Ertis-Baıan óńirinde jyl basynan 384 jol-kólik oqıǵasy tirkelip, 25 adam mert bolǵan. Jol apattarynyń jıileı túskeni baıqalyp otyr.

Óńirlik polıtsııa departamenti jergilikti polıtsııa qyzmetiniń málimetinshe, aımaqta jol-kólik apattary azaımaı tur.

– Jyl basynan beri oblys aýmaǵynda 384 jol-kólik oqıǵasy tirkelip, 529 adam zardap shekti, onyń 99-y kámeletke tolmaǵandar. Ókinishke qaraı, 25 azamat qaza boldy. Motokólik qatysqan 19 jol apaty tirkelip, olardyń saldarynan 1 adam kóz jumdy. Taǵy 16-sy jaraqat aldy, – dep habarlady basqarmadan.

Jol apattarynyń kóbeıýine baılanysty 585 jol ýchaskesine taldaý jasalyp, tekseris júrgizilgen. Nátıjesinde barlyq anyqtalǵan kemshilikterdi joıý boıynsha tıisti nusqamalar berilip, 103 laýazymdy jáne zańdy tulǵa jaýapqa tartylǵan. Olarǵa 4 mln teńgeden astam somaǵa aıyppul salynǵan.

Jyldamdyq rejımin buzý derekteriniń aldyn alý maqsatynda oblysta kún saıyn 10 «Kıber-Sherıf» mobıldi apparattyq-baǵdarlamalyq kesheni jumys isteıdi. Olardyń tórteýi respýblıkalyq jáne halyqaralyq mańyzǵa ıe avtojoldarda qyzmet atqarady. Sonymen qatar, barlyq ERAP planshetterimen ıntegratsııalanǵan «Orakýl-S» júıesiniń 10 apparattyq kesheninde «Qorǵaý» baǵdarlamasy engizilgen.

Budan bólek, respýblıkalyq mańyzdy avtojoldarda («Pavlodar-Astana», «Pavlodar – Abaı oblysy», «Pavlodar – RF shekarasy») ornatylǵan «Zerek» keshenderiniń kómegimen 3408 quqyqbuzýshylyq anyqtalǵan.

Eske sala keteıik, Astana-Pavlodar avtojolynda jol apatynan 5 adam zardap shekti.